Штури одговори од Владата и од Министерството за здравство на барањата од сопствениците на ресторани за свадби. Нема конкретен одговор од надлежните кога рестораните ќе се отворат и на кој начин ќе работат, ниту дали оваа прашање било разговарано од членовите на Комисијата за заразни болести. Од друга страна, кафулињата и рестораните кои работат со ограничено време се преполни со гости. Во некои објекти бројот на гости е и повеќе од сто, почитувајќи ги протоколите со одалечени маси и дистанца. Сопствениците на ресторани за свадби побараа да работат под истите протоколи како и отворените угостителски објекти.
„Комисијата за заразни болести и Министреството за здравство ја следат епидемиолошката состојба во државата и за евентуални измени на актуелните мерки и протоколи јавноста навремено ќе биде информирана“, наведуваат од Министерството за здравство.
– Advertisement –
„Сакаме да Ви укажеме дека Протоколите се темелат на мислење од Комисијата за заразни болести, кое се носи од анализите коишто ги вршат, а врз основа на епидемиолошката слика“, велат од Владата.
Сопствениците на рестораните најавија масовен протест следната недела доколку Владата нема слух на нивните барања. Предлогот е свадбите, родендените, крштевките или друг вид на прослави да се организираат како еден вид на гала вечери без жива музика, со оддалечени маси и ограничен број на гости. Според нив загубите нема да можат да ги надоместат доколку набрзо не ги отворат објектите и наместо за закрепнување, набрзо ќе зборуваат за целосно затворање на нивните бизниси.
Андреа Чобанова
