Инаугурацијата на новоизбраниот претседател на САД утре во Вашингтон ќе биде ден каков што не се памети – демократот Џо Бајден и неговата потпретседателка Камала Харис ќе положат заклетва во напуштен град полн со војници.
На жителите на Вашингтон им било кажано да останат дома и виртуелно да ја следат инаугурацијата на 46-от претседател на САД за да не ризикуваат инфекција со коронавирус.
Тие исто така се спречени да ја следат церемонијата во живо од огромниот број припадници на безбедносните сили кои се распоредени во забарикадираниот град, шокирани од нападот на приврзаниците на претседателот Доналд Трамп врз Капитол на 6 јануари.
Ниту Трамп нема да присуствува на церемонијата. Кога Џо Бајден ќе ја положи раката на Библијата напладне по локално време, тој веќе ќе биде надвор од Вашингтон, кршејќи ја традицијата за мирен и учтив трансфер на власта.
Републиканскиот милијардер ќе престојува во Мар-а-Лаго, Флорида, каде ќе отпатува во утре наутро.
„На сите што прашаа, нема да присуствувам на церемонијата на инаугурацијата на 20 јануари“, кратко објави тој во еден од неговите најнови твитови пред да му биде забрането да користи Твитер.
Трамп е првиот претседател по Ендру Џонсон во 1869 година што одбил да присуствува на заклетвата на неговиот наследник.
Традицијата диктира претседателот во заминување и неговата прва дама да го пречекаат новиот претседателски пар наутро на денот на заклетвата и да дојдат заедно во Капитол.
Неговиот потпретседател Мајк Пенс ќе присуствува на церемонијата.
Вашингтон е претворен во тврдина по нападот на Конгресот, храмот на американската демократија.
Повеќе од 20 000 припадници на Националната гарда, воени резервисти, го обиколуваат градот под оружје. Жичани огради и бетонски блокови се подигнати за да се заштитат спомениците како Белата куќа и Капитол или да се затворат главните патишта.
Ветераните од војната во Ирак го споредуваат центарот на градот со зелената зона во Багдад.
Националниот трговски центар, огромно поле што води од споменикот на Линколн до Капитол, ќе биде затворен за јавноста. Стотици илјади Американци традиционално се собираат таму за да го поздрават новиот претседател.
Наместо тоа, кренати се скоро 200.000 знамиња за да ги претставуваат граѓаните кои нема да можат да дојдат оваа година.
Американската полиција постојано предупредува дека заканите за нови вооружени напади од страна на крајно десничарски групи се реални. Новиот претседател планирал церемонијата на инаугурацијата да биде главно виртуелна за да се спречи ширењето на инфекцијата со ковид-19.
Од самиот почеток на неговиот мандат, тој сака да се разликува од Трамп, чии поддржувачи не сакаат да носат заштитни маски и не ги почитуваат повеќето епидемиолошки мерки.
По заклетвата, Бајден ќе одржи традиционален говор во кој ќе го потенцира помирувањето на Американците.
Ќе настапи поп-sвездата Лејди Гага која ќе ја испее американската химна и латино дивата Џенифер Лопез.
Во текот на попладнето, тој ќе положи венец на гробот на непознатиот херој на гробиштата Арлингтон со тројца негови претходници и нивните жени: Џорџ В. и Лора Буш, Бил и Хилари Клинтон и Барак и Мишел Обама.
По нивното враќање, поворката кон 46-от американски претседател ќе запре на неколку стотици метри од Белата куќа и Џо Бајден пеш ќе се упати кон неговата нова резиденција.
Потоа тој ќе може да ги објави своите први претседателски одлуки.
Наместо традиционални балови и концерти, вечерта ќе помине со телевизиско емитување на специјална емисија, а водител ќе биде актерот Том Хенкс, додека Џо Бајден и Камала Харис ќе и се обратат на јавноста преку малиот екран.
