Речиси 1.800 мигранти годинава ги загубија своите животи на патиштата за Европа или во рамките на Стариот континент, и покрај ограничувањата на границата поради пандемијата со Ковид-19, наведе Меѓународната организација за миграција (ИОМ), пренесе ДПА.

Бројката, што е еднаква на пет смртни случаи дневно, е пониска од минатогодишната бројка на смртни случиа на мигрантите во Европа од 2.200.

Глобалниот број на смртни случаи во сите миграциски токови од почетокот на јануари изнесува речиси 3.200, во споредба со 5.300 во целата минатата година, додафа германската агенција.

Портпаролот на ИОМ, меѓутоа, истакна дека и покрај целокупното намалување, некои миграциски маршрути за Европа и Јужна Америка, всушност, однеле повеќе животи отколку во претходните години.

-Најмалку 593 лица загинаа додека се обидуваа да го минат Средоземното море од Африка до шпанските Канарски острови, во споредба со 210 минатата година, изјави портпаролот на ИОМ, Пол Дилон, на прес-конференција во Женева.

„Постојат сериозни животно-загрозувачки празнини во следењето на овие маршрути”, додаде тој, повикувајќи ги владите да ги засилат операциите за пребарување и спасување на Медитеранот, пренесе ДПА.

Дилон предупреди дека намалувањето на глобалните смртни случаи не мора да значи дека бројките годинава навистина се опаднати, бидејќи пандемијата му отежнува на ИОМ да собира податоци и да ги следи миграциските маршрути.

Тажна реалност е дека во последните години се случија миграциски движења и раселувања во светот предизвикани од настани кои со себе донесоа големи страдања и трауми, како и загуба на човечки животи. Само во 2019 година бројот на меѓународни мигранти се искачи на 272 милиони, што претставува 3,5% од светската популација, а 74% се на работоспособна возраст (20-64 години), наведува Меѓународната организација за миграции при Обединетите Нации, по повод 18 декември – Mеѓународниот ден на мигрантите.

– Оваа година бевме сведоци како пандемијата на ковид-19 влијаеше на светот, значително ограничувајќи ја меѓународната мобилност. Пандемијата на ковид-19 значително влијаеше и на животот на мигрантите. Некои мигранти се вратија во нивните земји на потекло поради глобалните рестрикции и се соочуваат со тешкотии при реинтеграцијата на пазарот на трудот. Многу сезонски мигранти исто така не беа во можност да работат поради ограничувањата за патување. Консеквентната загуба на дознаките од странство, заради ковид -19, има катастрофално влијание врз животот и благосостојбата на безброј мигранти и нивните семејства во многу земји во светот. Меѓународните извештаи укажуваат на фактот дека во многу наврати, мигрантите немале пристап до здравствена заштита и информации за превенција од ковид-19. Случаи на ксенофобија, дискриминација и стигматизација се пријавени во многу земји, а дискриминацијата преовладувaла кога за мигрантите постела стигмата дека се носители на вирусот. Ова е случај, исто така и со мигрантите кои се вратиле во нивните земји на потекло, кои биле стигматизирани бидејќи се сметало дека го носат вирусот со себе, истакнуваат од Меѓународната организација за миграции – Агенција за миграции на Обединетите Нации.

По повод Меѓународниот ден на мигрантите, генералниот директор на Меѓународната организација за миграции, Антонио Виторино, порача дека „човековите права не се ‘заработуваат’ поради тоа што сте херој или жртва, туку тие се право на секој, без оглед на потеклото, возраста, полот и статусот”.

– Потребна е поддршка и заштита на мигрантите за да може тие целосно да придонесат кон нивното и нашето закрепнување. Како што вакцините стануваат достапни, на мигрантите, без оглед на нивниот статус, ќе мора да им се обезбеди правичен пристап. Глобалниот одговор кон КОВИД-19 претставува можност повторно да стане реална човечката мобилност, да се спроведе визијата за Глобалниот договор за безбедна, уредна и регуларна миграција и да се создадат просперитетни, здрави и отпорни заедници. Ние, сите заедно, можеме да го оствариме тоа”, вели Виторино.

Mеѓународен ден на мигрантите се одбележува на овој ден бидејќи на 18 декември 1990 година, Генерално собрание на Обединетите нации ја усвои Меѓународната конвенција за заштита на правата на работниците-мигранти и членовите на нивните семејства. 

Извор:МИА