Заменичката на претседателот на Владата задолжена за политики за добро владеење, Славица Грковска, во рамки на работната посета на Вашингтон оствари средба со глобалниот координатор за антикорупција на САД, Ричард Нефју, на која се разговараше за важноста на борбата против корупцијата како клучен елемент за напредок и развој на секое општество.
Како што се наведува во соопштението од Кабинетот на вицепремиерката, Грковска истакна дека справувањето со корупцијата е приоритет во стратешките цели на Владата и дека борбата против корупцијата бара активна улога на сите чинители на системот. Низ тој процес мора да биде обезбеден целосен општествен и политички консензус со целосна вклученост на сите учесници во овој процес, се посочува во соопштението.
За време на состанокот, глобалниот координатор за антикорупција на САД, нагласил дека е потребно промените да бидат видливи за граѓаните да го согледаат владеењето на правото и еднаквоста пред законот. Тој ги поздравил активностите и процесите кои Кабинетот за политики за добро владеење ги планира за претстојниот период и ја потврдил поддршката на САД за Северна Македонија на патот кон остварување на нејзините стратешки цели.
-Двајцата соговорници се согласија дека корупцијата не е проблем само на една држава или регион, туку е глобален предизвик, распространет секаде и само со заедничко работење и поддршка може борбата против корупција да биде успешна и да даде оптимални резултати, се посочува во соопштението.
Вицепремиерката Грковска потенцирала дека граѓаните се веќе суперсензитивни на корупција и на секаков вид на злоупотреба на службена должност. Работењето мора да биде базирано на транспарентност, отчетност, владеење на правото, ефикасност и ефективност.
Таа додаде дека е свесна дека корупцијата не може да се победи во целост, но мора да се покажат видливи и конкретни резултати, да се создадат услови за владеење на правото и еднаквост на секој граѓанин на државата пред законот и пред институциите.
-Сите ние, имаме обврска да ја зајакнеме довербата на граѓаните во институциите, нагласила вицепремиерката Грковска.
