Вицепремиерката задолжена за политики за добро владеење, Славица Грковска, во синоќешното гостување во емисијата „360 степени“ на ТВ Алсат истакна дека принципот на соодветна и правична застапеност одигра важна улога и на многумина им даде шанса да бидат вработени во јавната администрација, но дека тоа веќе се злоупотребува и нагласи дека треба да се најде модул кој одговара повеќе на сегашните околности.
– Во еден период, особено по Охридскиот рамковен договор, балансерот, односно принципот на соодветна и правична застапеност одигра важна улога и на многумина им даде шанса да бидат вработени во јавната администрација. Меѓутоа, како поминува времето, како се зголемуваат злоупотребите на балансерот, очигледно е дека тој веќе ја има завршено својата улога. Сметам дека треба да се најде модул којшто повеќе одговара на сегашните околности, нагласи вицепремиерката Грковска.
Таа потенцираше дека Северна Македонија во моментот е во фаза во која е потребен многу поголем квалитет и професионализам кај јавната администрација.
– Го почнуваме процесот за преговори со Европската Унија, скринингот ќе ги покаже сите слабости и ние едноставно ќе мора да преземаме мерки што ќе бидат болни за општеството, поради тоа што скринингот ќе биде брутално реален. Никој нас нема да не штеди во овој процес, оцени Грковска.
Според Грковска, со електронската лична карта ќе се намали ризикот од корупција.
– Незамисливо е да се зборува за дигитална трансформација на општеството без воведување на електронска лична карта, која е основна алатка за дигитализација на услугите во едно општество и во јавниот и во приватниот домен, рече Грковска.
Со нејзино воведување, како што посочи, ќе отпаднат многу коруптивни јазли и ќе се намали ризикот од корупција.
– Во недостаток на електронска лична карта ги користиме можностите на нашите акаунти во Управата за јавни приходи, со чија помош имаме пристап до електронските услуги што досега Владата и министерствата ги имаат направено дигитално, меѓутоа со оглед на тоа што недостига тој дел од Законот за архивско работење, наместо да ги направиме транспарентни и поефикасни институциите, ги успоруваме уште повеќе, оцени Грковска.
