Вишата школа за осигурување и финансии (ВУЗФ) од Бугарија потпиша меморандум со водечките приватни универзитети во Република Северна Македонија, Универзитетот ФОН, Универзитетот Американ колеџ Скопје и Универзитетот на Југоисточна Европа.
Меморандумите за соработка, како што изјави денеска генералниот директор на Бугарската телеграфска агенција (БТА), Кирил Валчев, на прес-конференцијата во просториите на БТА во Скопје, се резултат на обидот за зајакнување на соработката меѓу Бугарија и Северна Македонија во образованието.
Тој информираше дека низ годините, студентите од Република Северна Македонија (РСМ) се најголемата група странски студенти кои студираат на бугарските универзитети.
– Во различни периоди, студентите од Република Северна Македонија во Бугарија варираат меѓу 3000 и 5000, според Одделот за референтни информации на бугарската телеграфска агенција, рече Кирил Валчев.
Генералниот директор на БТА презентираше информации за различните договори кои се потпишани меѓу министрите за образование и наука на Бугарија и Република Северна Македонија низ годините.
– Последниве месеци имаше обид да се зајакне оваа соработка на државно ниво – повторно со потпишување различни договори, меѓу кои и Националната програма за унапредување на бугарското високо образование и да се олесни пристапот на Бугарите кои живеат во странство да предаваат на бугарските универзитети. Оваа програма треба да профункционира во 2022-2023 година и се спроведува со уредба на Советот на министри на Бугарија, изјави Валчев.
Истакна дека на универзитетите во Република Северна Македонија студираат и студенти од Бугарија, а според „референтните информации“ на БТА од 2006 година, околу 100 бугарски студенти студирале на универзитетите во РСМ.
На овој начин, според него, размената на знаење ќе стане уште еден мост меѓу луѓето кои живеат во Бугарија и во Република Северна Македонија.
Во Прес-центарот на БТА во Скопје присуствуваа и ректорот на ВУЗФ, професор Борис Велчев и амбасадорот на Бугарија во Република Северна Македонија, Ангел Ангелов.
