Граѓаните во Албанија, како и другите земји од Западен Балкан и пошироко, имаат легитимна загриженост за зголемувањето на цените на горивата и храната, соопшти Европска комисија.
Изјавата на ЕК уследи откако албанскиот премиер Еди Рама наведе дека функционер од Брисел му рекол дека протестите се во служба на Русија и Кремљ.
– ЕУ потсетува дека почитувањето на европските стандарди за слобода на мирно собирање и за заштита и вклучување на ранливите групи се клучни барања за членство, кои внимателно се следат. Сите вклучени актери мора да покажат максимална смиреност и воздржаност, истакнува ЕК.
ЕК во одговорот додава дека зголемувањето на цените „во голема мерка е од агресија и војната што ја започна Русија против Украина, а не од санкциите на ЕУ и нивната поддршка од Албанија“.
Во Тирана и многу други градови една недела се одржуваа протести против поскапувањето на горивата и прехранбените производи.
На протестот пред Владата, одржан во понеделникот, демонстрантите упатија три барања до премиерот Рама и предупредија дека доколку до утре не се исполнат ќе бараат негова оставка.
Првото барање се однесува на укинување на данокот на промет на нафтата и нафтените деривати, второто на привремено укинување на акцизата на горивата и третото се состои од донесување закон за егзистенцијален минимум.
Владата, како и нејзиниот прв човек во повеќе наврати изјавуваа дека „протестите се срамни, дека директно го нарушуваат на достоинство на Албанците како нација, како народ, како држава, како општество и оти го зајакнуваат Кремљ“.
