Светската здравствена организација (СЗО) денеска соопшти дека најмалку девет лица биле убиени во 16 напади врз здравствени установи во Украина од почетокот на руската инвазија врз земјата.
– До 7 март, СЗО потврди 16 напади врз здравствени установи во Украина. Овие напади се случија помеѓу 24 февруари и 3 март. Во моментов се истражуваат уште неколку инциденти, информира СЗО на Твитер.
– Овие напади завршија со смрт на најмалку девет лица, а 16 се повредени, додаде Организацијата на ОН нагласувајќи дека најмалку седум од повредените се здравствени работници.
Директорот на СЗО, Тедрос Аданом Гебрејесус, напиша дека имало неколку напади без да наведе детали, додавајќи дека таквите напади се кршење на меѓународното хуманитарно право.
СЗО не даде информации за сторителите на овие напади, затоа што системот за надзор нема мандат да собира такви информации.
