Ретка длабокоморска риба долга 4,8 метри е пронајдена на брегот на Тихиот Океан, во близина на градот Мехиљонес, на северот на Чиле. Необичниот морски жител, познат како крал на харингите, повторно го привлече вниманието на јавноста поради прекарот „риба на судниот ден“, кој се поврзува со народните верувања дека нејзиното појавување на брегот навестува земјотреси и цунами.
Откритието на плажата Чакаја го објавил Центарот за истражување на морската фауна и следење на китови и делфини – CIFAMAC. Според чилеанските медиуми, во истражувањето на случајот се вклучиле и стручњаци од Универзитетот во Антофагаста и чилеанската служба за рибарство.
Рибата, позната и како весларка (Regalecus gles e), се смета за најдолгата коскена риба во светот. Нејзиното тело е издолжено и сребрено, а впечатливата црвена грбна перка над главата формира гребен налик на круна. Очите на пронајдениот примерок имале пречник поголем од пет сантиметри.
Кралот на харингите живее во умерените и тропските води на Тихиот, Атлантскиот и Индискиот Океан, најчесто на длабочини од 200 до 1.000 метри. Иако обично се движи далеку од човечкиот поглед, понекогаш се појавува во плитките води или е исфрлен на брегот.
Возрасните примероци најчесто достигнуваат должина до 5,5 метри и тежина од околу 250 килограми. Сепак, забележани се и многу поголеми единки, а според Гинисовата книга на рекорди, најдолгиот документиран примерок достигнал 11 метри.
Рибата има издолжено тело без крлушки, со сребрено-бела боја и темни дамки. Се движи главно во исправена положба, со главата нагоре, користејќи брановидни движења на долгата грбна перка. Се храни со ситни ракови, крил и лигњи, кои ги внесува со устата, без да ги гризе со заби.
И покрај необичниот изглед, весларката не е опасна за луѓето и не поседува отровни жлезди.
Мистичната репутација на оваа риба потекнува од јапонскиот фолклор, каде што е позната како „гласник од палатата на морскиот бог“. Според народните верувања, нејзиното појавување во плитките води или исфрлањето на брегот може да биде предзнак за подводни земјотреси и цунами.
Верувањата повторно добија внимание по катастрофалниот земјотрес во Јапонија во 2011 година. Во месеците пред потресот во регионот Тохоку, на источниот брег на Јапонија биле пронајдени повеќе од 20 кралеви на харингите. По земјотресот, цунамито и нуклеарната несреќа во електраната Фукушима-1, овие случаи често се наведуваа како наводен знак за претстојната катастрофа.
И поновите наоди повремено ги поттикнуваат шпекулациите. Кон крајот на август 2026 година, мртва весларка долга околу четири метри била пронајдена кај индонезискиот остров Комодо. Неколку дена подоцна во регионот биле регистрирани земјотрес со магнитуда од 5,2 и зголемена вулканска активност, по што на социјалните мрежи повторно се појавиле тврдења дека рибата навестува природни катастрофи.
Научните истражувања досега не утврдиле докази дека појавувањето на кралот на харингите може да се користи за предвидување земјотреси или цунами.
Јапонски истражувачи во 2019 година ги споредувале архивските податоци за појавувањето на овие риби со регистрираните подводни потреси во период од повеќе децении. Анализата опфатила повеќе од 200 случаи, но не била утврдена статистички значајна поврзаност меѓу појавувањето на рибите и сеизмичката активност.
Постојат поприродни објаснувања зошто овие длабокоморски животни понекогаш завршуваат во плитките води. Бидејќи не се особено силни пливачи, болест, повреда, старост или исцрпеност може да ја намалат нивната способност да се спротивстават на морските струи. Силните бури, исто така, можат да ги оддалечат од нивното вообичаено живеалиште.
Северниот дел на Чиле се наоѓа во сеизмички активна област, во близина на зоната каде што плочата Наска се подвлекува под Јужноамериканската плоча. Во овој дел од Тихиот Океан се јавува и апвелинг – процес при кој студена вода од длабочините се издигнува кон површината и влијае врз морскиот екосистем.
Појавувањето на речиси петметарска весларка на чилеанскиот брег затоа претставува редок биолошки настан и можност за научно проучување на вид кој сè уште не е доволно истражен. Засега, нема научна основа овој наод да се толкува како предупредување за претстојна природна катастрофа.
