Сојузниците на Украина немаат друг избор освен да ја зголемат својата поддршка за таа земја во нејзината борба против Русија, изјави денес генералниот секретар на НАТО, Марк Руте, за време на видеоконференцијата на министрите за одбрана на земјите што ја поддржуваат Украина.
„Земјите мора да копаат подлабоко, ние немаме друг избор. Нашата колективна поддршка ќе ѝ овозможи на Украина да ги искористи можностите што сега ги создава на сите фронтови и да се одбрани од воздушни закани“, рече Руте, пренесува Ројтерс.
Порано денес, „Блумберг“ објави дека неколку европски земји имаат намера да купат американски ракети за системите за воздушна одбрана „патриот“ и да ги пренесат во Украина, со цел да ја зајакнат украинската одбрана од руски напади во наредните зимски месеци.
Повикувајќи се на неименувани извори, „Блумберг“ објави дека планот за набавка на ракети, кој е во последна фаза, ќе вклучува користење на средства од листата на приоритетни барања на НАТО за Украина, или PURL, за купување на нов пакет пресретнувачи што би биле доставени до Киев.
Според изворот, пресретнувачите ќе пристигнат во Украина на време за зимата.
Тие додадоа дека пакетот што се преговара е директен одговор на барањата на украинскиот претседател Володимир Зеленски, кој побара 300 ракети за системот „Патриот“ да бидат доставени во Украина, пренесува Танјуг.
Министерот за одбрана на Германија, Оскар Писториус, денес објави дека Германија ќе испорача ракети за системите за воздушна одбрана „Патриот“ на Украина од своите државни резерви.
Велика Британија објави дека ќе донира 100 милиони фунти за програмата PURL, но не е прецизирано колку од ова ќе биде доделено за ракетите „Патриот“.
Текстот Руте: Сојузниците на Украина немаат друг избор освен да ја зголемат поддршката во војната против Русија е превземен од МАКФАКС.
