Ким Јо Јонг, сестрата на севернокорејскиот лидер Ким Јонг Ун, денеска ги отфрли тврдењата на украинскиот претседател Володимир Зеленски дека Пјонгјанг има намера да испрати дополнителни 50.000 војници во Русија за да го зајакне својот сојузник, пишува „Ројтерс“.
Ким Јо Јонг, која е висок функционер на владејачката партија, во изјава за државната новинска агенција KCNA, ја оцени проценката на Зеленски како „неоснована“ и ја нарече „инсцениран инцидент“.
Зеленски го изнесе своето тврдење претходно овој месец во објава на платформата X, повикувајќи ја Јужна Кореја да ѝ помогне на Украина со снабдување со системи за воздушна одбрана.
Ким Јо Јонг изјави дека САД и Западот се единствено одговорни за избувнувањето и продолжувањето на украинската криза.
Според достапните проценки, Северна Кореја веќе испратила околу 14.000 војници во рускиот Курски регион во 2024 година. Ова распоредување се базира на Договорот за сеопфатно стратешко партнерство, кој беше договорен за време на посетата на рускиот претседател Владимир Путин на Пјонгјанг во јуни 2024 година.
Украински и независни извори проценуваат дека Пјонгјанг, исто така, испорачал артилериски и минофрлачки гранати, балистички ракети, артилерија со долг дострел и повеќекратни ракетни фрлачи во Русија.
Ким додаде дека „непријателската политика“ на САД кон Северна Кореја не се променила, и покрај тоа што претседателот Доналд Трамп нареди значително намалување на американското учество во заедничките воени вежби со Јужна Кореја.
Таа рече дека односот меѓу лидерите на САД и Северна Кореја е „навистина одличен“, но Вашингтон продолжува да спроведува воени вежби со Сеул, загрозувајќи ја националната безбедност на Пјонгјанг.
Таа, исто така, рече дека не е запознаена со никаква неодамнешна комуникација меѓу двајцата лидери. Трамп во понеделникот изјави дека добил одговор од Ким откако ги намалил воените вежби на САД со Сеул. Тој рече дека Северна Кореја не е закана и дека ги почитуваат САД.
фото/ЕПА
Текстот Сестрата на Ким Јонг Ун му одговори на Зеленски: Неговите тврдења се неосновани е превземен од МАКФАКС.
