Истражувањата покажуваат дека три црвени сокови можат да помогнат во намалувањето на крвниот притисок и со тоа да се намали ризикот од сериозни здравствени проблеми, како што се срцев удар и мозочен удар.
Високиот крвен притисок, или хипертензија, е еден од најчестите здравствени проблеми кај возрасните. Тоа е состојба во која срцето мора посилно да пумпа крв низ телото, што со текот на времето става дополнителен товар на крвните садови и виталните органи. Доколку не се контролира, хипертензијата може да го зголеми ризикот од срцеви заболувања, мозочен удар, откажување на бубрезите и деменција.
Крвниот притисок често може да се регулира со промена на животните навики, како што се откажување од пушење, редовна физичка активност и умерена консумација на алкохол. Исхраната, исто така, има големо влијание, а прекумерниот внес на сол е еден од главните фактори што придонесуваат за развој на хипертензија.
Додека одредени видови храна и пијалоци можат да го зголемат крвниот притисок, други можат да придонесат за негово намалување. Меѓу нив се издвојуваат сокот од цвекло, домат и калинка.
Сок од цвекло
Сокот од цвекло е богат со нитрати, природни соединенија кои можат да помогнат во намалувањето на крвниот притисок. Телото ги претвора нитратите во азотен оксид, молекула што ги опушта и шири крвните садови, подобрувајќи ја циркулацијата.
Преглед на научни истражувања објавени во 2022 година во списанието Frontiers in Nutrition, кој вклучуваше седум студии, покажа дека консумирањето сок од цвекло може да го намали систолниот крвен притисок кај луѓе со хипертензија.
Сок од домати
Несолениот сок од домати може да има сличен ефект. Студија објавена во 2019 година во списанието Food Science & Nutrition ги следела испитаниците кои пиеле околу 200 милилитри сок од домати дневно во текот на една година.
Истражувачите откриле дека кај луѓе со нетретирана хипертензија или прехипертензија, и систолниот и дијастолниот крвен притисок се намалиле.
Сок од калинка
Сокот од калинка е исто така поврзан со подобри вредности на крвниот притисок. Мета-анализа објавена во 2017 година во списанието Pharmacological Research, која вклучуваше осум клинички студии со вкупно 574 учесници, покажа дека редовното консумирање сок од калинка може да придонесе за намалување и на систолниот и на дијастолниот крвен притисок.
Што друго може да помогне?
Покрај правилната исхрана, експертите за регулирање на крвниот притисок препорачуваат најмалку 150 минути умерена физичка активност неделно, одржување на здрава телесна тежина, намалување на внесот на сол и умерена консумација на алкохол.
Исто така, се препорачува да се ограничи внесот на кофеин од кафе, чај, енергетски и газирани пијалоци, како и да се престане со пушење.
Доколку имате висок крвен притисок или се сомневате дека можеби го имате, контактирајте го вашиот лекар за да добиете соодветна дијагноза и препораки за третман.
Текстот Три најдобри сокови за намалување на крвниот притисок е превземен од МАКФАКС.
