Францускиот претседател Емануел Макрон го предупреди белорускиот лидер Александар Лукашенко да не го продлабочува вклучувањето на својата земја во руската војна против Украина, дознава АФП од извор близок до Макрон, објавува „Киев Индепендент“.
Телефонскиот разговор, одржан на 24 мај, се случи во време на сè погласни шпекулации дека Белорусија би можела да се вклучи подиректно во војната на страната на Русија.
Белоруските државни медиуми претходно објавија дека двајцата лидери разговарале по телефон, наведувајќи дека повикот бил инициран од француска страна. Ова беше првиот директен контакт меѓу Макрон и Лукашенко од почетокот на руската инвазија на Украина.
„Макрон ги нагласи ризиците за Белорусија ако дозволи да биде вовлечена во агресивната војна на Русија против Украина“, изјави француски извор за АФП.
Францускиот претседател, исто така, го повика Лукашенко да преземе неопходни чекори за подобрување на односите меѓу Белорусија и Европа.
Разговорот следеше помалку од една недела откако украинскиот претседател Володимир Зеленски предупреди на 20 мај дека Русија можеби подготвува нова офанзива на северот од Украина со помош на Белорусија. Непосредно пред тоа, Минск објави дека учествува во заеднички нуклеарни воени вежби со Москва.
Во меѓувреме, Русија започна масовен воздушен напад врз Киев, насочувајќи кон главниот град речиси сто балистички ракети. Културниот и историскиот центар на градот беше нападнат, а музеите, училиштата и зградите на државните институции беа оштетени.
Според извештаите, во нападот беше употребена и балистичката ракета со среден дострел „Орешник“, нов руски систем на оружје распореден од Москва во Белорусија. Размерот на нападот и употребата на „Орешник“ дополнително ги зголемија стравувањата од можна белоруска ескалација на конфликтот.
Портпаролот на украинската државна гранична служба, Андреј Демченко, на 24 мај, за време на гостување на државната телевизија, изјави дека засега нема зголемување на белоруските сили по границата.
„Што се однесува до нашата граница, за среќа, во овој момент не регистрираме никакво движење на опрема, оружје или персонал во нејзина непосредна близина, ниту нивна концентрација“, рече Демченко.
Сепак, тој предупреди дека разузнавачките служби регистрираат зголемен руски притисок врз Белорусија да се приклучи на војната.
Макрон претходно изјави дека Европа и Русија мора да имаат директен дијалог за војната во Украина, вклучително и разговори со рускиот претседател Владимир Путин. Во декември 2025 година, тој рече дека техничките подготовки за вакви разговори се во тек.
Последниот телефонски разговор меѓу Макрон и Лукашенко се одржа на 26 февруари 2022 година, само два дена по почетокот на руската инвазија на Украина.
Текстот Макрон го предупреди Лукашенко да не ја вовлекува Белорусија подлабоко во војната против Украина е превземен од МАКФАКС.
