Тест лансирања на нуклеарни ракети започнаа денес на полигонот Кура во рускиот регион Камчатка, објави „Анадолу“. Вежбите ќе траат до 10 мај, соопшти регионалната влада.
Регионалните власти ги повикаа жителите строго да ги почитуваат безбедносните мерки и да не го посетуваат полигонот или околните области за време на вежбите.
„Присуството и движењето на луѓе и каква било опрема е забрането“, се вели во соопштението.
Полигонот Кура е еден од клучните објекти под администрација на Руските воздухопловни сили. Се наоѓа околу 500 километри северно од Петропавловск-Камчатски, во мочурлива област покрај реката Озернаја.
Објектот се користи за вежбање на ракетни цели и тестирање на разни видови ракетно оружје.
Уште од советската ера, со децении служи како место за прием на боеви глави за интерконтинентални балистички ракети лансирани од други полигони за тестирање, вклучувајќи го космодромот Плесецк и полигонот Капустин Јар.
Вежбите на полигонот Кура се одржуваат редовно, обично неколку пати годишно. Тие може да вклучуваат планирани тестови на нови ракетни системи, како и обука за борбени лансирања спроведени од персоналот на Руските стратешки ракетни сили.
Текстот Русија започнува со тестирање на нуклеарни ракети е превземен од МАКФАКС.
