Музејот Лувр во Париз беше принуден да ги затвори вратите вчера по грабежот во кој беа украдени непроценливи кралски скапоцености.

Полицијата започна масовна потера и е во „трка со времето“ за да ги пронајде непроценливите предмети, објавува Скај њуз.

Светски познатиот музеј беше затворен откако крадци влегле во галеријата во која се сместени француските крунски скапоцености вчера околу 9:30 часот. Според францускиот министер за внатрешни работи, крадците влегле користејќи корпа со кран, скршиле прозорец и избегале со скапоценостите, за кои францускиот министер рекол дека се „од вистинска вредност на наследство и, се всушност, бесценети“.

Кражбата на деценијата
Уметничкиот детектив Артур Бренд го опиша инцидентот како „кражба на деценијата“, додавајќи дека полицијата има само една недела да ги пронајде сторителите пред предметите да исчезнат засекогаш.

„Овие крунски скапоцености се толку познати што едноставно не можете да ги продадете“, изјави Бренд за Скај њуз. „Единственото нешто што можат да го направат е да го стопат среброто и златото, да ги расклопат дијамантите, да се обидат да ги исечат. Така веројатно ќе исчезнат засекогаш.“

„Полицијата има една недела. Ако ги фатат крадците, работите би можеле сè уште да бидат таму. Ако потрае подолго, пленот веројатно е исчезнат и расклопен. Тоа е трка со времето.“

Список на украдени вредни предмети
Француското Министерство за култура објави список од осум украдени предмети, додека деветтиот предмет, иако украден, беше пронајден на местото на настанот.

Меѓу украдените накити се тиара и ѓердан од комплетот на кралицата Мари-Амели, смарагдниот ѓердан и обетките на царицата Мари Луиз, тиарата на царицата Евгенија и нејзиниот голем брош за корсет со 2.438 дијаманти.

Професионално извршена кражба
Властите открија детали за грабежот откако музејот, кој привлекува до 30.000 посетители дневно, објави на социјалните мрежи дека се затвора од „вонредни причини“.

Министерката за култура Рашида Дати рече дека снимката покажува дека крадците „немале намера да нападнат луѓе, тие влегле мирно за четири минути, ги скршиле витрините, го зеле пленот и си заминале“. Таа ги опиша како професионалци и дека не изгледаше насилно.

Министерот за внатрешни работи Лоран Нуњез потврди дека крадците користеле кран-корпа монтирана на камион. Бандата била добро подготвена, откако претходно ја извидувала локацијата и го исекла стаклото на прозорецот со „аголна брусилка“ пред да избега со два мотоцикли, веројатно Јамаха ТМАКС.

Форензичката работа е во тек и се составува детален список на украдените предмети.

Откако влегле во музејот, крадците се упатиле кон галеријата Аполон, дом на француските крунски скапоцености. Во оваа раскошна сала се наоѓа и кралската колекција од скапоцени камења, слики и таписерии, како и три историски дијаманти.

Францускиот претседател Емануел Макрон напиша на Икс: „Ќе ги вратиме делата, а сторителите ќе бидат изведени пред лицето на правдата. Се прави сè, насекаде, за да се постигне ова“.

Историја на грабежите во Лувр
Ова не е прв пат Лувр да биде цел на крадци. Во 1911 година, познатата Мона Лиза беше украдена од нејзината рамка и беше пронајдена дури две години подоцна.

Во 1983 година беа украдени два ренесансни оклопи, кои беа вратени дури во 2021 година, речиси четири децении подоцна.

фото: принтскрин

Текстот (Видео) Потрагата по крадците од Лувр е во тек: „Ако не бидат фатени за една недела дијамантите ќе исчезнат засекогаш“ е превземен од МАКФАКС.

ПОВРЗАНИ НАПИСИПОВЕЌЕ ОД АВТОРОТ