Францускиот претседател Емануел Макрон денес ќе ја прифати оставката на премиерот Франсоа Бајру откако неговата влада не ја доби довербата во парламентот, а францускиот лидер мора итно да најде наследник за да избегне нова политичка криза.
Вчера, Бајру претрпе пораз на гласањето за доверба во парламентот што самиот го свика, туркајќи ја Франција во нова неизвесност и оставајќи го Макрон со задачата да го пронајде својот седми премиер.
Кабинетот на францускиот претседател соопшти дека Макрон „го забележал“ исходот и дека ќе назначи нов премиер „во наредните денови“, со што ќе се стави крај на шпекулациите за предвремени избори.
Макрон утре ќе се сретне со Бајру за да ја прифати оставката на неговата влада. Точно кога би можел да биде именуван нов премиер останува нејасно, но извор близок до Макрон рече дека назначувањето е можно уште во вторник, а претседателското обраќање исто така не е исклучено.
Бајру ги изненади дури и своите сојузници со тоа што свика гласање за доверба за да се стави крај на долгогодишниот ќорсокак околу неговиот предлог за буџет за штедење, кој вклучуваше речиси 44 милијарди евра намалување на трошоците за намалување на долгот на Франција.
На гласањето во Националното собрание, 364 пратеници гласаа против владата, додека само 194 ѝ дадоа доверба.
Макрон има неколку опции – ниту една од нив не е особено привлечна, објавува Би-би-си.
Тој би можел да назначи нов премиер, но наоѓањето кандидат кој нема веднаш да биде одбиен од една од главните парламентарни фракции нема да биде лесно. Минатата година, процесот траеше неколку недели. Бајру веројатно ќе остане на функцијата како технички премиер додека не се именува наследник.
Макрон би можел да распише и нови парламентарни избори. Тоа би го променило сегашниот баланс на моќ, но би можело да резултира со уште поубедлива победа за крајно десничарскиот Национален собир на Марин Ле Пен.
Друга опција е да се распишат претседателски избори на кои Макрон нема да може да се кандидира бидејќи неговиот втор мандат завршува во 2027 година. Некои парламентарни групи го повикаа да го направи тој потег, но тој постојано повторуваше дека нема да поднесе оставка.
Текстот Соочен со криза во Франција, Макрон мора брзо да назначи наследник на Бајру е превземен од МАКФАКС.
