Израелската армија, според Хамас, продолжи со бомбардирањето на Појасот Газа, напаѓајќи болница во вторник вечерта, убивајќи еден новинар, по паузата да се ослободи израелско-американскиот заложник Еден Александар.
Додека Доналд Трамп денес тргнува на турнеја низ Блискиот Исток, ослободувањето на единствениот жив заложник кој има американско државјанство беше можност за редок одмор за населението на Блискиот Исток.
Но, израелската армија рано утрово објави дека погодила „команден и контролен центар лоциран во болницата Насер во Кан Јунис“, на јужната палестинска територија.
„Високи функционери на Хамас продолжуваат да ја користат болницата за терористички активности, цинично и брутално експлоатирајќи го цивилното население во и околу болницата“, се вели во објавата.
Властите на Хамас подоцна објавија дека загинале неколку пациенти, без да го наведат бројот. Тие го обвинија Израел за убиството на новинарот Хасан Аслих, директор на палестинската новинска агенција Алам24, кој беше на лекување откако беше ранет во претходен напад на 7 април, кога беа убиени уште двајца палестински новинари.
Израелската армија потоа објави дека цел на бомбардирањето бил токму Аслих, наречен „терорист кој дејствува под маската на новинар“ и наводно „учествувал во масакрот на 7 октомври“.
По двомесечно примирје, Израел ја продолжи својата офанзива врз Газа на 18 март, заземајќи големи области од палестинската територија, а на 5 мај објави план за „освојување“ на Газа.
Од 2 март, израелската војска го забрани влезот на хуманитарна помош во Газа, каде што околу 2,4 милиони луѓе живеат под опсада.
Прекинот на огнот што стапи на сила помеѓу 19 јануари и 17 март им овозможи на 33 израелски заложници, вклучувајќи осум тела, да ја напуштат Газа во замена за ослободување на околу 1.800 палестински затвореници.
Нападот на Хамас на 7 октомври 2023 година резултираше со смрт на 1.218 лица на израелска страна, повеќето од нив цивили, според податоците на АФП, базирани на официјални информации.
Од 251 лице киднапирано тој ден во Израел, 57 се уште се во Газа, вклучувајќи 34 кои беа прогласени за мртви од страна на израелската војска.
Израелските одмазди во Газа оставија најмалку 52.862 мртви, повеќето од нив цивили, според бројките објавени во неделата од Министерството за здравство на Хамас, кои Обединетите нации ги оценија како веродостојни.
Текстот Хамас: Израел продолжи со бомбардирањето по ослободувањето на заложникот, убиен е новинар е превземен од МАКФАКС.
