Британскиот премиер Кир Стармер и неговиот колега од Нов Зеланд Кристофер Луксон се очекува да се договорат за продлабочување на одбранбените и безбедносните врски, вклучително и зајакнување на поддршката за Украина, кога ќе се сретнат утре, соопшти канцеларијата на Стармер.
Лидерите ќе можат да ја видат работата на војските на двете земји кои ги обучуваат украинските сили во југозападна Англија, соопшти канцеларијата на Стармер, а Луксон се очекува да ја потврди својата поддршка за иницијативата до крајот на годината.
За време на посетата се очекува лидерите да разговараат за плановите за зајакнување на одбранбената и безбедносната соработка, а на министрите им е наложено да работат на ново заедничко одбранбено партнерство меѓу двете земји, се вели во соопштението.
Стармер рече дека Британија и Нов Зеланд „стоеле рамо до рамо со генерации во потрагата по мир и стабилност“.
„Додека светот станува сè поопасно место, јас сум горд на тоа колку правиме заедно за да ја поддржиме нашата национална и економска безбедност – зголемување на трошоците за одбрана, распоредување на нашите морнарици заедно во Индо-Пацификот и продолжување на нашата работа да ја ставиме Украина во најсилна можна позиција за да ја одвратиме сè поагресивната Русија“, рече Стармер во изјавата.
Текстот Велика Британија и Нов Зеланд ја зајакнуваат одбраната поради Русија е превземен од МАКФАКС.
