Универзитетот Харвард ја тужеше администрацијата на претседателот Доналд Трамп во обид да го спречи замрзнувањето на владата на повеќе од 2 милијарди долари средства за престижната американска образовна институција.
Во тужбата, поднесена до федералниот суд во Бостон, се вели дека Трамп започнал широк напад врз врвното финансирање на истражување на големите универзитети, бидејќи се обидува да ги ослободи од, како што вели, антисемитизмот и идеолошката пристрасност.
„Овој случај ги вклучува напорите на Владата да го искористи скратувањето на федералното финансирање како потпора за преземање на контролата врз академското одлучување на Харвард“, се наведува во тужбата.
Харвард тврди дека постапките на администрацијата на Трамп биле произволни и незаконски и го прекршиле правото на Универзитетот за слобода на говор со Првиот амандман.
„Во текот на изминатата недела, федералната влада презеде неколку активности откако Харвард одби да ги исполни неговите незаконски барања“, рече претседателот на Харвард, Алан Гарбер во изјавата.
„Поднесовме тужба за да го запреме замрзнувањето на финансирањето бидејќи тоа е незаконско и надвор од овластувањата на владата“, рече Гарбер.
Администрацијата на Трамп започна преглед на федералното финансирање на Харвард од 9 милијарди долари во март и последователно му даде на универзитетот сеопфатен список на барања, вклучувајќи забрана за носење маски и ставање крај на сите програми за различност, правичност и вклучување.
Оттогаш, администрацијата на Трамп замрзна 2,3 милијарди долари финансирање за Харвард и се закани дека ќе му го одземе статусот на универзитетот ослободен од данок и ќе му ја ускрати можноста да запишува странски студенти. Побара и информации за надворешните односи на универзитетот, финансирањето, студентите и професорите.
Текстот Харвард ја тужи администрацијата на Трамп поради замрзнување на финансирањето е превземен од МАКФАКС.
