Кампањата за куќи од едно евро стана вообичаен начин за зголемување на населението во напуштените италијански села. Сега еден град на Сицилија користи слична тактика за да привлече повеќе туристи да ги посетат.
Сикулиана, град во провинцијата Агриџенто на Сицилија, на туристите им нуди одмор за едно евро. За помалку од цената на едно еспресо, туристите можат да поминат долг викенд во приморски град на Сицилија, пишува „Еуроњуз“.
Градскиот туристички одбор се надева дека можноста за одмор за само едно евро ќе привлече повеќе посетители во областа за време на вонсезоната, но и дека ќе стане препознатлива туристичка дестинација ширум светот.
Што е вклучено во понудата?
Сикулиана нуди бегство платено со сите трошоци за неколку среќни патници. Сè што треба да направат е да ја платат сицилијанската туристичка такса која чини едно евро. Понудата вклучува двојно сместување, оброци и тури со водич, но туристите мора сами да си го платат патувањето до овој град на западниот брег на островот.
Понудата беше организирана од Туристичкиот одбор на Сикулиана, а победниците ќе престојуваат во еден од партнерските објекти на организацијата. Избраните посетители по пристигнувањето ќе бидат пречекани со пијалок за добредојде во хотелот, а ќе уживаат и во пијалок во пристаништето. Тие исто така можат да уживаат во екскурзии со водич до атракции во областа, како што се Марина Сикулиана и природниот резерват Торес Салса со заштитените плажи и необични карпи.
Но, за да имате шанса да го освоите вашиот одмор од соништата, ќе мора да бидете креативни.
Како можете да освоите одмор од едно евро?
Заинтересираните страни треба да достават оригинално видео во кое ги објаснуваат нивните мотиви за учество. Значи, ако никогаш не сте слушнале за ова место, може да биде непријатно. Но, туристичкиот одбор на Сикулиана нуди неколку идеи за тоа што да се каже, на пример, фрази како „заслужуваме одмор“, „ја сакаме Сицилија“ и „сакаме да јадеме сицилијанска храна“ ќе ви помогнат да победите.
За да влезете, мора да имате над 18 години и да снимите видео. Во вашата апликација, мора да наведете дали патувате со пријател, член на семејството или партнер, како и нивната возраст, град на живеење и информации за контакт преку телефон и е-пошта.
Апликациите ќе ги оценува Туристичкиот одбор, кој бара различни елементи на успешна апликација, вклучувајќи оригиналност и креативност, причини за посета, како и ентузијазам и желба да се открие Сикулиана. За време на празниците, од учесниците ќе биде побарано да снимат видео-дневник од нивниот престој во Сикулијана и да ги споделат најважните моменти од секој ден со Туристичкиот одбор.
Има места за 10 парови, а победниците ќе бидат објавени на 20 март.
Апликациите се отворени до 15 март.
Текстот Италијански град нуди одмор за едно евро: Што е вклучено во понудата? е превземен од МАКФАКС.
