Силен тајфун Конг-реј го зафати источниот брег на Тајван, што ги натера сите градови и окрузи да прогласат слободен ден, финансиските пазари да се затворат и стотици летови да бидат откажани поради, како што се очекува, најголемата бура во последните 30 години.
Невремето го погоди планинскиот и ретко населениот округ Таитунг на источниот брег, според тајванската централна метеоролошка управа, со силни ветрови и обилни дождови кои го зафатија речиси целиот остров.
Супертајфунот Конг-реј малку ослабна во текот на ноќта, но остана силен како еквивалент на ураган од четврта категорија со удари над 250 километри на час.
Метеоролошката управа на Тајван соопшти дека тоа ќе биде најголемиот тајфун што го погодил островот од 1996 година.
„Се надевам дека сите во земјата ќе соработуваат за да се избегнат катастрофи и ќе се воздржат од опасно однесување како што е гледање бранови за време на тајфуни“, напиша претседателот Лаи Чинг-те на својата Фејсбук страница.
Синоптичарите соопштија дека откако ќе го погоди источниот брег, бурата значително ќе ослабне и ќе се упати кон Тајванскиот теснец и ги повикаа жителите ширум островот да останат дома поради ризикот од силни ветрови.
Текстот Силен тајфун го погоди Тајван е превземен од МАКФАКС.
