Насилството ескалира во северозападниот дел на Мексико откако властите го објавија апсењето на синот на озлогласениот мексикански нарко бос Хоакин Ел Чапо Гузман.

Локалните медиуми тврдат дека Овидиј Гузман-Лопез бил уапсен во градот Кулијакан во државата Синалоа во текот на ноќта.

Се верува дека тој е висок член на картелот Синалоа – една од најголемите криминални организации за трговија со дрога во светот.

Во градот се пријавени пукотници и кражби на автомобили.

Мексиканската авиокомпанија „Аеромексико“ соопшти дека авионот што требало да лета од Кулијакан до Мексико Сити бил погоден од огнено оружје во четвртокот наутро додека се подготвувал да полета.

Градоначалникот Хуан де Диос Гамез на Твитер потврди дека федералните вооружени сили спроведуваат операција во Кулијакан од четвртокот рано наутро и дека таа предизвика насилство во градот и во другите делови на државата.


Мексиканските безбедносни сили претходно го уапсија Гузман-Лопез во 2019 година, но го ослободија за да избегнат насилство под закана од неговите соработници.

Американскиот Стејт департмент тврди дека тој и неговиот брат, Хоакин, во моментов надгледуваат приближно единаесет лаборатории за метамфетамин во државата Синалоа, кои произведуваат приближно 1.300-2.200 килограми месечно.

Според истиот извор, информациите укажуваат дека Гузман-Лопез наредил убиства на доушник, шверцер на дрога и популарен мексикански пејач кој одбил да пее на неговата свадба.

Во декември, САД објавија награда до 5 милиони долари за информации кои ќе доведат до апсење и/или осуда на Овидио и тројца негови браќа, за кои се верува дека имале командни позиции во картелот.

ПОВРЗАНИ НАПИСИПОВЕЌЕ ОД АВТОРОТ