Најдобриот кандидат на испитот за даночни сметководители во Јужна Кореја признал дека мамел со помош на вештачка интелигенција. Тој со минијатурна камера ги фотографирал прашањата, ги испраќал до систем со вештачка интелигенција, а потоа одговорите ги читал од паметен телефон.
Кандидатот, кој се претставил само со презимето Хан, објавил видео-извинување на Јутјуб, во кое признал дека најдобриот резултат не го постигнал со чесна работа.
„Мамев користејќи електронски уреди и генеративна вештачка интелигенција. Тоа што го положив испитот со најдобар резултат не беше плод на чесна работа“, навел тој.
Со признанието ги потврдил сомнежите во јавноста дека користел недозволена технологија, но истовремено ги отфрлил шпекулациите дека мамел со паметни очила со вештачка интелигенција, што претходно го негираше.
Хан соопштил дека писмена изјава веќе доставил до полицијата во Сеул и дека целосно ќе соработува во истрагата. Се извинил на другите кандидати, стручната јавност и надлежните институции, објаснувајќи дека мамел од страв за својата иднина и од желбата да ги направи родителите горди.
Скандалот доаѓа по неколкумесечни сомнежи, откако Хан постигнал речиси совршени резултати на стотици прашања во двата испитни термина, во април и јули.
Случајот предизвика дополнителна загриженост во Јужна Кореја, каде што во четврток треба да се одржи годишниот национален приемен испит за факултетите. Од претседателската канцеларија најавија дека сериозно го сфаќаат проблемот и дека подготвуваат мерки за спречување мамење со вештачка интелигенција.
Висок владин претставник најави и итен состанок на кој ќе се разгледуваат можните мерки, додека премиерката Хан Сеок-сук претходно призна дека во јавноста постои загриженост дека кандидатите би можеле да користат вештачка интелигенција и на претстојниот приемен испит.
Владата најави дека внимателно ќе го следи целиот испитен процес за да обезбеди фер и регуларно полагање.
