Русија секој месец во Украина губи повеќе од 40.000 војници, вклучувајќи ги загинатите и тешко ранетите, изјави генералниот секретар на НАТО, Марк Руте.
Тој истакна дека оваа бројка е споредлива со вкупните американски жртви претрпени во текот на 14-те години на војната во Виетнам.
Руте го изјави ова за време на говор на форумот „Атлантска иднина“ (Atla tic Futu e), одржан вчера, пренесува „Украинска правда“.
Руте објасни дека рускиот претседател Владимир Путин не успева да ги оствари своите цели на бојното поле, наведувајќи ги како причина огромните човечки загуби што Русија ги претрпе во последните месеци.
„Соединетите Американски Држави изгубија 56.000 луѓе во Виетнам во текот на 14 години. Овде, Русија има 40.000 загинати или тешко ранети во само еден месец. Првичните податоци за октомври сугерираат дека оваа бројка би можела да надмине 50.000. Педесет илјади во само еден месец“, рече Руте.
Генералниот секретар на НАТО смета дека, поради неуспесите на фронтот, Путин се свртел кон напади врз цивили во обид да ја скрши волјата на Украина за борба. Тој изјави дека Русија ги гаѓа украинските градови со ракети и беспилотни летала, обидувајќи се да ја уништи критичната инфраструктура пред почетокот на зимата.
„Русија, исто така, ја интензивираше кампањата на непријателски активности низ Европа. Путин се обидува да нè подели, да ги дестабилизира нашите општества и да ја наруши нашата поддршка за Украина преку дејствија како што се подметнување пожари, инциденти со беспилотни летала, сајбер-напади и други злонамерни акции. Но, да бидеме јасни – тој не успева. На секој руски хибриден напад врз нашите нации, ние одговараме со испраќање уште поголема помош за Украина“, рече тој.
Алијансата претходно процени дека Русија претрпела повеќе од 50.000 жртви само во септември – вклучително и 28.000 загинати – бројка што е значително поголема од загубите на украинските вооружени сили. Според проценката објавена во текот на летото, НАТО смета дека Русија изгубила повеќе од 1,4 милиони војници од почетокот на инвазијата.
