Израел им доставил на САД и на земјите од Персискиот Залив разузнавачки информации според кои Иран разгледува можност за употреба на хемиско оружје против своите противници, објави „Њујорк тајмс“.
Израелските претставници тврдат дека заканата од хемиско оружје е поитна од иранската нуклеарна закана. Според нив, Иран развива технологија за испорачување хемиско оружје со ракети или за негово тајно пренесување во непријателски земји.
Меѓу американските и претставниците на земјите од Персискиот Залив постојат различни ставови за овие информации. Дел од американските претставници сметаат дека Израел ги користи разузнавачките податоци за да го поттикне претседателот Доналд Трамп да ги обнови воените операции против Иран.
Некои претставници на заливските земји изразиле скептицизам и ги оцениле израелските информации како несериозни. Други американски претставници, пак, ги сфаќаат предупредувањата сериозно, имајќи ги предвид и другите разузнавачки проценки за можни ирански напади врз американските интереси и сојузници.
Кабинетот на израелскиот премиер не ги коментирал конкретните тврдења, но за „Тајмс оф Израел“ соопштил дека Израел внимателно ја следи секоја закана од иранскиот режим и е подготвен да ѝ се спротивстави.
