Форензичките тимови во Шпанија ги завршија обдукциите на 69 лица загинати во железничката несреќа, но досега се идентификувани само 36 жртви. Семејствата на исчезнатите се собрале во Толедо, каде што од Цивилната гарда биле предупредени да се „подготват за најлошото“, пренесува „Паис“.
Од 36 идентификувани лица, семејствата на 27 жртви веќе биле известени. Претседателот на покраината Кастиља-Ла Манча, Емилијано Гарсија-Пејџ, предупредил дека процесот на идентификација е исклучително сложен.
Според него, во мртовечниците се наоѓаат 68 тела, додека едно лице починало во болница. Остатоците пронајдени при извлекувањето на вагоните сè уште се идентификуваат. Досега биле пронајдени и 31 вреќа со делумни посмртни останки.
Идентификацијата се спроведува според шпанскиот национален протокол за постапување при несреќи со голем број жртви, кој е во сила од 2009 година. Во процесот се вклучени правосудните органи, судските лекари, полицијата и Националниот институт за токсикологија и форензички науки.
Семејствата на исчезнатите најпрво се собрале во спортската сала на државно училиште во Урда, а потоа биле пренесени во седиштето на Цивилната гарда во Толедо. Таму пријавувале исчезнати членови на семејствата, давале информации за нив и доставувале примероци за ДНК-анализа.
Во постапката се споредуваат податоците собрани од посмртните останки, вклучувајќи отпечатоци од прсти и ДНК, со медицинската документација, снимките и генетските примероци од членовите на семејствата.
Во идентификацијата учествуваат повеќе од 60 експерти. Кога бројот на жртви надминува 30, примероците се испраќаат во две лаборатории за да се забрза постапката.
Меѓу исчезнатите има и странски државјани. Од 14 пријави што се однесуваат на државјани на 10 земји, ДНК-примероци се собираат и од нивните роднини во странство, со помош на Интерпол.
Според податоците од петокот навечер, од вкупно 72 пријави за исчезнати лица, пет лица биле пронајдени живи, а 67 пријави останале активни. Две лица биле пронајдени во болници, додека за едно било утврдено дека воопшто не се качило во возот на денот на несреќата.
Во Кастиља-Ла Манча во петокот навечер биле хоспитализирани 39 лица. Од нив, 17 биле на одделенијата за интензивна нега, а 22 биле сместени на други болнички одделенија.
