Две сериозни безбедносни ранливости во програмскиот јазик PHP – кој го користат бројни веб-сајтови и апликации – би можеле да им овозможат на хакерите да преземат контрола врз серверите, без потреба да се најавуваат во системот.
Националниот CERT издаде предупредување за оваа опасност, апелирајќи до администраторите што поскоро да ги инсталираат безбедносните ажурирања. Поради овие откриени ранливости, веб-сајтовите на владините институции во неколку европски земји се привремено исклучени.
PHP е програмски јазик што служи како основа за многу веб-сајтови, онлајн продавници и деловни апликации. Тој, исто така, се користи во системите на јавните институции и приватните компании.
Овие новооткриени пропусти се особено опасни бидејќи напаѓачот може да испрати специјално креирано барање до веб-сајтот, со што би извршил сопствен код на серверот, и сето тоа без потреба од корисничко име или лозинка.
Успешниот напад може да доведе до кражба на податоци, промена на содржината на веб-сајтот или инсталирање на злонамерен софтвер.
Проблемите вклучуваат две ранливости, идентификувани како CVE-2026-109618 и CVE-2026-109619. За двете е одредена оценка за сериозност од 9,2 од можни 10.
Овие ранливости произлегуваат од грешки во управувањето со меморијата, кои се јавуваат при обработката на веб-барањата.
Серверите што го користат PHP како дел од својот систем за обработка на барања од посетителите на веб-сајтовите се изложени на посебен ризик. Експертите предупредуваат дека за искористување на ранливоста, во одредени конфигурации, не е потребна никаква претходна автентикација. Напаѓачот би можел да се обиде да го искористи пропустот уште пред апликацијата да започне со извршување на сопствениот програмски код.
Вчера, на 21 октомври, тимот за развој на PHP објави безбедносни ажурирања кои ги решаваат откриените ранливости. Безбедносните верзии се PHP 8.5.12, 8.4.27, 8.3.36 и 8.2.35.
Сите постари верзии во рамките на овие развојни гранки мора да се ажурираат. Посебна загриженост предизвикуваат уште постарите верзии на PHP, кои веќе не се официјално поддржани и за кои повеќе не се објавуваат редовни безбедносни ажурирања.
Тимот за развој нагласува дека ажурирањето е единственото целосно решение за идентификуваните ранливости.
Националниот CERT препорачува компаниите и институциите да утврдат кои од нивните системи користат PHP и да ги ажурираат што е можно поскоро.
Приоритет треба да им се даде на серверите до кои може да се пристапи директно од интернет, бидејќи тие се најизложени на потенцијални напади.
Доколку ажурирањето не може да се изврши веднаш, се препорачува привремено да се ограничи пристапот до ранливите системи или, врз основа на проценка на ризикот, тие да се исклучат од интернет.
Администраторите, исто така, треба да проверат дали нивните апликации користат застарени верзии на PHP за кои веќе не се достапни безбедносни ажурирања.
Што ако серверот е веќе компромитиран?
Доколку постои сомневање дека напаѓач веќе искористил некоја ранливост, CERT препорачува изолирање на погодениот сервер од мрежата. Важно е да се зачуваат системските дневници (логови) и да се провери за непознати или неодамна додадени датотеки, необични програми и други промени што би можеле да укажуваат на неовластен пристап.
Агенцијата на Европската унија за сајбер-безбедност (ENISA), CERT-EU и Европол, исто така, ги повикаа организациите веднаш да ги проверат своите системи и да ги применат достапните безбедносни ажурирања.
