Речиси секој барем еднаш на интернет наишол на слика од жена со збунет израз на лицето опкружена со математички равенки. Мемето познато како „Math Lady“ се користи со години за да прикаже ситуации кои се збунувачки, комплицирани или бараат премногу размислување.
Зад ова вирално лице стои бразилската актерка Рената Сора, а кадарот доаѓа од бразилската теленовела „Senhora do Destino“ од 2004 година, во која таа ја играше една од најпознатите улоги во нејзината кариера, Назаре Тедеско.
Клип од серијата почна да се шири на бразилските социјални мрежи околу 2013 година. На него се гледа Тедеско додека е во затвор како гледа во далечина, а корисниците подоцна додадоа математички формули врз неа за да покажат збунетост.
Мемето набрзо се прошири надвор од Бразил и стана еден од најпрепознатливите интернет симболи за моменти кога се обидуваме да откриеме нешто.
Сора, сепак, имаше долга и успешна актерска кариера дури и пред нејзината вирална слава. Таа реагираше на популарноста на мемето со малку изненадување. „Мојот внук кој живее во Њујорк им кажува на сите дека неговата тетка е „Math Lady“ и сите се возбудуваат“, изјави таа за бразилското списание Quem во 2024 година.
Сепак, таа призна дека понекогаш не ѝ е лесно кога луѓето ја препознаваат само по таа улога.
„Понекогаш е тешко. Се сеќавам на еден фестивал во Куритиба, поминував покрај кафуле полно со млади луѓе и слушнав: ‘Види, тоа е жената од мемето’. Човек работи напорно, работи во театарот, е исцрпен… и на крајот станува ‘жената од мемето’. Немам контрола врз тоа, но не ми пречи“, рече таа.
Сора е сè уште активна во светот на глумата. Моментално се појавува во новата сапуница „Por Você“ („За тебе“), а поради промената во нејзиниот изглед од снимањето на „Senhora do Destino“, многу гледачи можеби нема веднаш да ја поврзат со виралното меме.
фото/Depositphotos
Текстот (Видео) Која е „Math Lady“? Актерката која стана меме сега има 79 години е превземен од МАКФАКС.
