Сандра Булок за прв пат јавно проговори за својот покоен партнер Брајан Рендал, кој почина во август 2023 година. Рендал имаше 57 години и почина од амиотрофична латерална склероза (АЛС), три години откако беше дијагностицирана. Американската актерка ја потврди трагичната вест во изјава во тоа време, но до сега не зборуваше подетално за загубата.
Двојката, која беше во врска осум години, одлучи да ја чува неговата болест во тајност. Булок откри во подкастот „Smartless“ дека тоа била желба на Рендал, но призна дека одлуката ја оставила целосно изолирана. „Знам зошто ме замоли да го направам тоа“, рече таа.
Таа објасни дека нејзината тага започнала долго пред неговата смрт. „Четири години тагував за Брајан пред да почине“, рече таа. „Нешто се промени. Мојот маж го снема долго пред неговото тело да го напушти. Не мислам дека можев да се справам со тоа сè додека не почина, бидејќи постојано си во движење низ целиот тој процес.“
Актерката додаде дека сè се случило за време на глобална пандемија и карантин. Конечната дијагноза дојде речиси истовремено со почетокот на карантинот. „Всушност, тој беше болен половина од нашата врска“, објасни таа.
„Имам дете со тешка астма и бев во паника. Имав две мали деца кои минуваа низ сето ова, особено мојата ќерка која го гледаше како татко“, се присети таа. „Не можев никому да кажам. Некое време, само сестра ми знаеше што се случува. Тоа е огромен товар.“
Подоцна, таа им се довери на својата блиска пријателка Џенифер Анистон и Аманда Анка, сопругата на водителот на подкастот Џејсон Бејтман.
По смртта на Рендал, Булок беше видена во јануари 2024 година на Бахамите како ја расфрла неговата пепел. Извори блиски до актерката открија дека двојката разменила неформални завети таму во 2017 година и дека често ги поминувале семејните одмори таму.
Нејзината сестра Гесин Булок-Прадо потврди дека дел од пепелта била расфрлана и во Вајоминг, на бреговите на реката Снејк. На неговиот 58-ми роденден, таа објави видео на Инстаграм со пораката: „Среќен роденден, Брај. Сенди те однесе до реката, токму како што вети.“
Двојката се запознала кога Рендал, фотограф по професија, ја фотографирал роденденската забава на синот на Сандра, Луис, кого таа го посвоила во 2010 година. Заедно ја одгледале нејзината посвоена ќерка Лајла и неговата ќерка Скајлар од претходна врска.
фото/Depositphotos
Текстот Сандра Булок за нејзиниот покоен партнер: „Тој беше болен половина од нашата врска“ е превземен од МАКФАКС.
