Со почетокот на туристичката сезона во Хрватска повторно се актуелизираа поплаките за високите цени на такси-превозот, а едно искуство од Задар предизвика бројни реакции во јавноста.
Хрватка за „Слободна Далмација“ раскажала дека нејзиниот син минатата недела пристигнал со автобус од Риека во Задар, од каде требало да продолжи кон аеродромот. Иако постои автобуска линија до аеродромот, поради страв дека нема да стигне навреме на летот, одлучил да земе такси од станицата.
Според нејзините тврдења, таксистот му рекол дека цената на превозот ќе биде во вообичаени рамки, односно меѓу 25 и 30 евра. Сепак, по возење кое траело помалку од 20 минути, возачот му наплатил дури 90 евра.
Мајката вели дека останала шокирана од сумата и смета дека станува збор за неприфатлива практика, особено затоа што нејзиниот син е млад патник кој во моментот не знаел како да реагира.
По инцидентот, таа ги предупредила своите пријатели и познаници кои патуваат во Хрватска да бидат внимателни при користење такси услуги и, доколку е можно, однапред да ја проверат цената на превозот.
Според неа, ваквите случаи негативно влијаат врз угледот на домашните превозници и оставаат лош впечаток кај туристите. Таа додава дека за претстојниот одмор во Далмација веќе резервирала автомобил и сместување преку меѓународни платформи, наведувајќи дека досега немала проблеми со нивните услуги.
„Би сакала да им посакам сè најдобро на домашните компании, но додека се случуваат вакви работи, тешко е да ги препорачам нивните услуги“, изјавила таа за „Слободна Далмација“.
Случајот повторно ја отвори дебатата за цените на такси-превозот во туристичките центри на хрватското приморје, каде секое лето има поплаки од патници за прескапи возења и недоволна транспарентност на тарифите.
Текстот За 20 минути возење со такси му наплатиле 90 евра е превземен од МАКФАКС.
