Морски дрон опремен со околу 100 килограми експлозив бил пронајден во близина на грчкиот остров Лефкада, објави грчката радиостаница ЕРТЊуз.

Дронот, долг околу шест метри, бил забележан во четвртокот покрај карпи во близина на островот, а неговиот мотор сè уште работел кога го пронашле рибари. Според извештаите, рибарите не биле свесни дека пловилото носи експлозив и го одвлекле до мало пристаниште на островот.

Грчката крајбрежна стража соопшти дека експлозивот бил уништен во контролирана експлозија, по што дронот бил префрлен во специјален поморски објект за понатамошна истрага.

Властите сега го испитуваат неговото потекло, техничките способности и маршрутата по која се движел.

Грчките медиуми објавија дека станува збор за дрон од типот МАГУРА, кој се користи во војната меѓу Украина и Русија.

Министерот за цивилна заштита Михалис Хрисохоидис изјави дека станува збор за „сериозен случај“.

Весникот Катимерини објави дека истражителите проверуваат можна поврзаност со украинските операции против руската „флота во сенка“ што превезува нафта.

Според сведоци, моторот на дронот сè уште бил активен, што предизвикало сомнежи дека операторите изгубиле контрола врз него и дека тој би пловел сè додека не удри во брегот.

Грчките власти изразиле загриженост поради фактот што вооружен морски дрон успеал да стигне до туристички остров, отворајќи прашања за поморската безбедност, заштитата на инфраструктурата и безбедноста на населението.

Текстот (Фото+видео) Морски дрон со 100 килограми експлозив пронајден кај грчкиот остров Лефкада е превземен од МАКФАКС.

ПОВРЗАНИ НАПИСИПОВЕЌЕ ОД АВТОРОТ