Данските вооружени сили отпуштија неколку лица од активна воена служба кои се сметаат за безбедносен ризик поради семејни врски со Русија. Нема докази, дури ни индикација, дека лицата за кои станува збор извршиле какво било кривично дело. Меѓу нив е и капетанот на данските вооружени сили Фредерик Хансен, пишуваат медиумите.
По 43 години служба, Хансен е отпуштен од војската во февруари оваа година врз основа на тоа што повеќе немал безбедносен сертификат од данската воена разузнавачка служба (FE). Проблемот е што неговата сопруга, Ана Засорина Хансен, докторка со која е во брак 15 години, е од руско потекло и има мајка и сестра во Русија.
FE признава дека нема причина да се сомнева во лојалноста на Хансен кон Данска, но тврди дека тој би можел да стане „очигледна и ранлива цел за уцена и други форми на притисок, под кои може да се очекува дека нема да се спротивстави“. Со други зборови, ФЕ верува дека Фредерик Хансен би можел да биде притиснат од неговата сопруга да открие доверливи информации од данските вооружени сили.
„Јас не сум направил ништо лошо, ниту мојата сопруга“
„Ова е кршење на моите човекови права. Јас не сум направил ништо лошо, ниту мојата сопруга. Никој не може да се одбрани од такви обвинувања. Можам само да кажам дека никогаш не сум попуштил и никогаш нема да попуштам пред таков притисок“, изјави Фредерик Хансен, кој во 2023 година учествуваше во мисијата на НАТО во Косово како безбедносен службеник, за данскиот канал ТВ2.
„Доколку Русија изврши притисок врз семејството на мојата сопруга и се закани дека ќе ги испрати во Сибир, јас и онака нема да можам ништо да направам. Напротив, прво би контактирал со ФЕ доколку почувствувам каков било притисок насочен кон мене“, рече Хансен, додавајќи дека ќе оди на суд и ќе бара надомест од 160.000 евра, односно неговата годишна плата.
Само еден месец пред да ја изгуби безбедносната дозвола, Хансен бил награден со медал за „верна служба во копнените сили“, а откако се оженил со Ана Засорина, три пати ја поминал безбедносната проверка на военото разузнавање.
„Тоа е како да полагате возачки испит и да го положите со одлични резултати, но потоа испитувачот ви кажува дека постои ризик во иднина да го надминете ограничувањето на брзината, па затоа нема да ви дадат возачка дозвола“, рече разочараниот дански офицер.
Синдикатот на професионални воени лица и цивилни службеници во данските вооружени сили вели дека случаите на одземање на безбедносните дозволи стануваат сè почести, а особено се погодени војниците со членови на семејството од Иран, Русија, Кина и Венецуела. Другите членки на НАТО и Европската Унија досега немале вакви случаи.
Аналитичарите шпекулираат дека причината е слабеењето на класичната руска дипломатска и разузнавачка инфраструктура во Данска. Во исто време, потребата на Русија за информации е зголемена, па затоа се користат други методи, како што е искористување на семејните врски.
Текстот Дански капетан: Бев отпуштен од војската по 43 години затоа што мојата сопруга е Русинка е превземен од МАКФАКС.
