Зборовите што ги користиме во врската можат да имаат големо влијание врз врската, а познатите психолози д-р Џон Готман и д-р Џули Шварц Готман тврдат дека една едноставна фраза може да открие дали врската има долгорочна иднина. Откако проучувале дури 40.000 парови, тие заклучиле дека благодарноста е еден од најважните темели на успешна врска, објавува „YourTango“.
Фразата што ја издвојуваат е: „Ти благодарам“. Овие два збора, според Готманови, се едни од најдобрите индикатори за тоа дали врската ќе преживее или не. Психолозите објаснуваат дека луѓето во врски сакаат да чувствуваат дека нивниот партнер ги забележува и ги цени нивните напори.
Благодарноста не мора да вклучува големи гестови
„Успешната врска бара култура на благодарност во која сме подеднакво вешти во забележувањето што нашите партнери прават добро и што прават погрешно“, нагласуваат психолозите. Тие додаваат дека многу луѓе со текот на времето почнуваат да забележуваат само недостатоци на својот партнер и забораваат да му се заблагодарат за мали, секојдневни гестови.
Според една студија од 2017 година, партнерите кои редовно изразуваат благодарност имаат три пати помала веројатност да ја прекинат својата врска. Друга студија покажа дека луѓето кои се чувствуваат ценети полесно се справуваат со стресот и имаат подобри односи. Психолозите нагласуваат дека благодарноста не мора да вклучува големи гестови, туку мали работи како правење кафе, помагање низ дома или покажување трпение и внимание.
Готманови предупредуваат дека земањето на партнерот здраво за готово може да создаде негативен образец во врската.
„Сепак, лесно е да се падне во стапицата да се види само она што вашиот партнер не го прави“, велат тие. Затоа препорачуваат почесто да се кажува зборот „благодарам“, бидејќи токму малите, секојдневни гестови на благодарност можат да помогнат во прекинувањето на „циклусот на негативност“ и зајакнување на блискоста меѓу партнерите.
Текстот Психолози: Луѓето во најсреќните врски редовно кажуваат два збора е превземен од МАКФАКС.
