Како дел од новата иницијатива во Ормускиот теснец што ја објави американскиот претседател Доналд Трамп во неделата, бродовите на американската морнарица нема нужно да обезбедуваат придружба на трговските бродови, објави новинарот на „Аксиос“, Барак Равид, на „Икс“, откако американската војска го потврди своето учество во операцијата.
Бродовите на американската морнарица ќе бидат „во близина“ во случај да треба да спречат напад од страна на иранската војска врз трговските бродови што се движат низ Заливот, објави Равид.
Американскиот претседател објави во неделата дека САД ќе започнат операција за „спасување“ на бродови на неутрални земји кои се заглавени во Ормускиот теснец во понеделник наутро, без да даде детали за операцијата или дали американската морнарица ќе учествува во неа.
Трамп ја опиша акцијата во објава на социјалната мрежа Truth Social како „хуманитарен гест“ чија единствена цел беше да им помогне на неутралните земји кои не учествуваат во војната меѓу САД и Израел против Иран.
„За доброто на Иран, Блискиот Исток и Соединетите Американски Држави, им кажавме на овие земји дека безбедно ќе ги отстраниме нивните бродови од овој ограничен воден пат за да можат слободно и вешто да продолжат со својот бизнис“, напиша Трамп во објавата.
Според Меѓународната поморска организација, стотици бродови и околу 20.000 морнари се заглавени во теснецот и не можат да го напуштат од почетокот на конфликтот, пренесува Ројтерс.
Текстот Трамп најавува акција во Ормускиот теснец; „Аксиос“: Морнарицата на САД нема нужно да учествува е превземен од МАКФАКС.
