Најмалку две лица загинале, а 20 се повредени, од кои девет потешко, откако руски проектили погодиле преполн трговски центар во централниот украински град Кременчук, изјави Кирил Тимошенко, заменик шеф на Кабинетот на украинскиот претседател.
Advertisements
Претходно украинскиот претседател Володимир Зеленски рече дека бројот на жртви е „незамислив“, повикувајќи се на извештаите дека во трговскиот центар кога се случил нападот имало повеќе од 1000 луѓе.
Тој вели дека метата не претставувала „никаква закана за руската војска“ и дека нема „стратешка вредност“. Зеленски ја обвини Русија дека се обидува да го саботира обидот на луѓето да живеат нормален живот, а тоа толку многу ги лути окупаторите.
Градот Кременчук се наоѓа во украинската област Полтава.
Украинските власти претходно денеска соопштија дека градот Лисичанск е цел на руски напад. Градот е последното украинско упориште во источната област Луганск. Нападите доаѓаат во време кога западните лидери на Самиот на Г7 во Германија ветија дека ќе продолжат да ја поддржуваат Украина.
