Индија ја започна својата прва вселенска мисија за проучување на Сонцето, помалку од две недели откако влезе во историјата со тоа што стана првата земја што успешно слетала вселенско летало во близина на јужниот пол на Месечината.
Вселенското летало Адитија-Л1 полета денеска од вселенскиот центар Срихарикота во јужна Индија, со мисија на научниците да го проучуваат Сонцето од точка која е близу 1,5 милиони километри од Земјата, растојание кое сочинува само 1 процент од растојанието помеѓу Земјата и Сонцето.
Индиската агенција за вселенски истражувања појасни дека вселенското летало е опремено со седум инструменти за проучување на сончевата корона, хромосферата, фотосферата и соларниот ветер.
Ќе бидат потребни четири месеци за вселенското летало да го направи ова патување.
Според Европската вселенска агенција, точката Лагранж, каде што индиската мисија има за цел да стигне е местото каде што гравитационите сили на два големи објекти – во овој случај Земјата и Сонцето – се поништуваат меѓусебно, овозможувајќи му на вселенското летало да „лебди“. Ова значи дека на сателитот ќе му треба многу малку гориво за да може да работи.
Од таква позиција, научниците ќе можат континуирано да го гледаат Сонцето. Првата индиска мисија за проучување на најголемиот објект во Сончевиот систем е именувана по Сурија – што на хинду значи Сонце, исто така познато и како Адитија.
Индија неодамна стана првата земја која слета вселенско летало во близина на јужниот пол на Месечината, за кое научниците веруваат дека може да содржи витални резерви на замрзната вода. /Alsat.mk
