Компанија “Космос” бара 45,7 милиони евра отштета од Меѓународната Tениска Feдерација (ИТФ) за прекршување на договорот за организација на “Дејвис Kупот”, изјави претседателот Жерар Пике.
„По раскинувањето на договорот од страна на ИТФ, сега постои спор меѓу двете страни во кој бараме 45,7 милиони евра“, изјави поранешниот фудбалер на Барселона во интервју за „Марка“.
Во 2018 година, “Космос” склучи 25. годишен договор со ИТФ за домаќин на “Дејвис Kупот”, но во јануари оваа година ИТФ одлучи да ја врати контролата врз натпреварувањето и го раскина договорот со компанијата на Пике.
“Космос” поднесе тужба до Судот за спортска арбитража (CAS) за „неоправдано прекршување на договорот“, а извор запознаен со ова рече дека двете страни не успеале да постигнат финансиски договор.
„Веруваме дека она што го направивме со Дејвис купот е неверојатно успешен резултат. Стигнавме кога конкуренцијата беше на најниско ниво. За една година четири пати ги зголемивме приходите. Отидовме од три на 15 спонзори“, продолжи тој и додаде дека никој не можел да го предвиди влијанието на вирусот Ковид-19.
„Фиксната цена што ја плаќавме не беше пазарна. Корона вирусот беше невозможно да се предвиди, немаше “Дејвис Kуп” во 2020 година, а дел од 2021 се играше зад затворени врати“.
