Српскиот претседател Александар Вучиќ изјави дека по завршувањето на истрагата српските власти ќе покренат обвинение против Милан Радојчиќ. Тој додаде дека воените и цивилните власти ги истражуваат околностите на настанот во Бањска и оти јавноста ќе биде информирана за резултатите од истрагата. На 24 септември, вооружена група Срби ја нападна косовската полиција во Бањска, Звечан, убивајќи го наредникот Африм Буњаку. Во судирите загинаа и тројца терористи. Косово ја обвини Србија за нападот, но Белград негираше вмешаност. Институциите во Косово и Србија спроведуваат одделни истраги за настанот.
„Обвинителството го гони за тешки кривични дела кои самиот ги призна. Истрагата ќе продолжи и потоа ќе има обвинение. Тоа ќе покаже од каде доаѓаат парите и нелегалното оружје. Откривањето на тоа е наша меѓународна обврска и тоа ќе биде направено“, рече Вучиќ.
