Од 6 до 16 јули во седиштето на УНЕСКО се одржа сесија за светското културно наследство, на која биле разгледани рекорден број досиеја – околу 250. Ова беше една од најобемните сесии во последните години, што е очекувано поради застојот во периодот на пандемијата со ковид, изјави бугарскиот министер за култура Маријан Бачев пред состанокот на владата, јавува БГНЕС, пренесува Трибуна.
„Сè помина со извонредна организација. Професор Ненов се претстави исклучително добро како претседавач на сесијата. Претставивме неколку настани поврзани со изложбата По брановите на Црното Море низ вековите, настапот на Бистришките баби, ансамбл кој е впишан во листата на нематеријално културно наследство на УНЕСКО, како и документарниот филм Богатствата на Бугарија од проф. Бетани Хјуз“, рече Бачев.
Една од најдобрите вести, според него, е дека Центарот за подводна археологија во Созопол се очекува да биде признаен како институт од категорија 2, што ќе ја зајакне водечката улога на Бугарија во оваа област.
Во врска со стравувањата за статусот на Несебар, министерот истакна дека во следните две години нема опасност градот да биде избришан од листата на материјално културно наследство, иако на Бугарија ѝ се поставени задачи за зачувување на објектот.
„Сите политички сомнежи околу домаќинството на УНЕСКО мислам дека се расчистени. Бугарското претседателство е успешно“, нагласи премиерот Росен Желјазков.
