Жан Митрев и Клиничката болница „Жан Митрев“ испратиле писмо до амбасадите на САД, Франција, Германија, Велика Британија, Холандија и до Делегацијата на ЕУ во земјава со кое ги информираат за текот на истрагата на Основното јавно обвинителство во случајот против нив, повикувајќи ги внимателно да ја следата целата истражна постапка.

– Ви се обраќам со намера да Ве информирам и запознам за случајот што верувам дека може да остави длабоки траги во општественото живеење, во перципирањето на здравствената професија и случај што претендира да воведе лоша пракса во правосудниот систем во државата. Ваквите примери можеби се ретки, но и како такви може да предизвикаат штета со далекусежни последици, се наведува во писмото.

Во писмото се бара зголемен мониторинг на судскиот процесот заради „несериозниот и површен пристап“, бидејќи, како што се наведува, од сите оние што се повикани како сведоци пристигнуваат „сведоштва за несериозноста и нецелосно иследување“.

– И затоа Ви се обраќам со надеж и желба дека ќе го поттикне Вашиот интерес и ќе го побуди Вашиот фокус на мониторинг на овој случај. Верувам во една вистина, онаа што е поддржана со факти и онаа што некој ја доживеал, треба само да се создадат услови за истата да ја види светлината на денот и да се толкува таква како што е, недвосмислено и целосно, се додава на крајот од писмото.

Основното јавно обвинителство – Скопје по утврдување на определени околности во текот на предистражната постапка, на 12 август минатата година донесе наредба за спроведување истражна постапка против Жан Митрев поради постоење основано сомнение дека го сторило кривичното дело „измама“ од член 247 став 4 во врска со став 1 од Кривичниот законик.

Според ОЈО – Скопје, осомничениот во периодот од април 2020 година до 2022 година, со цел да прибави противправна имотна корист за клиниката „Жан Митрев“, „со лажно прикажување факти, ги довел во заблуда пациентите лекувани од КОВИД-19 со методот на хемофилтрација“.

Имајќи ги предвид околностите, надлежниот јавен обвинител до Основниот кривичен суд Скопје достави предлог на Митрев да му биде одземена патна или друга исправа со која би можел да ја премине државната граница, како и да биде изречена забрана за издавање нова.

– Ваквата мерка е предложена заради неопходноста да се обезбеди присуството на осомничениот и за непречено водење на постапката, информираа од Јавното обвинителство.​

По завршување на истрагата, на 10 јануари, ОЈО – Скопје поднесе обвинение против Жан Митрев и клиниката „Жан Митрев“ за кривичното дело „измама”, за што е предвидена казна затвор во траење до 10 години.

Истрагата против Митрев и Клиниката „Жан Митрев“ уследи по сторијата на Истражувачката репортерска лабораторија (ИРЛ) во која се тврдеше дека приватната болница „Жан Митрев“ на пациенти при лекување од Ковид-19 им наплаќала високи суми за хемофилитрација, иако таа метода не била пријавена во Агенцијата за лекови – МАЛМЕД. По сторијата, Митрев покрена тужба против ИРЛ, која ја повлече на почетокот на месецов.