Во рамките на својата работна посета на Албанија министерот за одбрана на Република Бугарија, Атанас Запрјанов, учествуваше на панелот „Земјите од Југоисточна Европа како гарант за безбедноста на Европската унија“ во рамки на Форумот за поврзаност – Тирана 2025, јавува БГНЕС, пренесува Трибуна.
На дискусијата учествуваа и министерот за одбрана на Албанија, Пиро Венгу, како и политичари и експерти од регионот.
Во своето обраќање, министерот Запрјанов нагласи дека Бугарија и Албанија не се само соседи, туку и блиски сојузници во НАТО, кои ја делат заедничката одговорност за безбедноста и стабилноста на регионот. Тој го истакна Паневропскиот коридор број 8 како клучна инфраструктура за воената мобилност на НАТО, логистичката поврзаност меѓу Црното и Јадранското Море, но и за економскиот развој.
Запрјанов потсети и на придонесот на Бугарија кон регионалната безбедност преку учество во мисиите на НАТО и ЕУ (KFOR, EUFOR – Althea). Тој изрази благодарност до Албанија за нејзиниот ангажман во борбената група на НАТО во Бугарија и во мисијата KFOR во Косово, нагласувајќи дека заедничката обука на војниците од двете земји е доказ за високото ниво на доверба.
Министерот за одбрана потенцираше дека воената мобилност, поврзаноста и одбранбената индустрија се меѓу приоритетите на новата стратешка рамка на НАТО и ЕУ, додавајќи дека Бугарија активно работи на изградбата на одбранбени способности.
На крај, Запрјанов ја потврди безусловната поддршка на Бугарија за европската интеграција на Албанија, истакнувајќи дека интеграцијата на Западен Балкан е од суштинско значење за мирот, стабилноста и просперитетот на Европа.
