Владата реагираше со соопштение и го кажа тоа што е и нејзина и одлука на Штабот, дека должност е на службениците да ги пропуштат сите граѓани кои со своите возила се затекнати надвор од државата и се враќаат за време на полицискиот час, рече денеска премиерот Зоран Заев во врска со обвинувањата на ВМРО-ДПМНЕ дека тој се јавил на Граничниот премин Деве Баир да бидат пропуштени пет возила во еден часот по полноќ, за време на полициски час.
-Вистината е дека, да, лично јас се јавив на полициска службеничка, прекрасен глас, Виолета ниту ја знам, заради тоа што овие возила веќе беа влезени на територијата на Република Северна Македонија и чекаа без право да мрднат, не им даваше никој заради тоа што влегле после 22 часот. Значи, нема дилеми полицијата и царината како и сите возила си проверуваат. Мене ми се обрати граѓанин, знам дека беше од турска националност, наш граѓанин, ниту знам името и презимето, ниту знам кој е, но знам дека имаше дечиња во автомобилот. Уште еднаш се консултирав вечерта, после полноќ беше тоа, јас сум достапен за сите граѓани. Јас се консултирав вечерта дали имаме таква мерка, зошто е тоа забрането – ми кажаа, се повикаа токму на таа мерка која секако Штабот уште еднаш ја реафирмира за да нема дилема дали тоа важело само на првиот ден, 10-ти кои се затекнале или мерката важи додека трае полицискиот час, објасни Заев попладнево на прес-конференција.
Според него, секој би го направил тоа.
-За деца се работи. Веројатно и не беше ни толку ладно да се чека до 5 часот сабајле, но зошто кога има мерка да бидат пропуштени граѓаните. Чесно постапив, не сум прекршил ништо, ако има нешто спорно нека проверат самите институции. Но рековме, да им бидеме слуги на граѓаните и треба да им служиме на граѓаните. Дечињата се наше богатство и секако верувам кој и да е тоа би го направил, рече премиерот Зоран Заев.
