Овој викенд членовите на здружението на медицински сестри, техничари, акушерки и стоматолошки сестри „ЗА НАС“ беа дел од Скопскиот маратон и трчаа во чест на колегите и колешките кои борејќи се против пандемијата го загубија својот живот, но и за оние кои сѐ уште во првите борбени редови.
Иницијативата за учество на овогодинешниот маратон е поттикната од потребата повторно да се подигне гласот, но преку една убава спортска манифестација, како што и прилега на нашата племенита професија.
-Нашите членови трчаа во маички со слогани кои говорат за важноста на сестринската професија но, и за оние работи кои недостасуваат.
Еден од нашите слогани вели дека медицинските сестри се секогаш во кондиција, и тоа е навистина така. Да се биде медицинска сестра значи голема пожртвуваност и подготвеност во секој момент.
Ние сме најважната алка во здравствениот систем и потребни се промени, потребен е закон со кој ќе се унапреди и заштити нашата професија.
„Не правете нѐ невидливи. Ние денес трчаме за нас!” – мотото со кое оваа година за првпат земавме учество на Скопскиот маратон, но со надеж дека оваа инцијатива ќе прерасне во традиција и ќе не има во многу поголем број, велат од здружението.
