Денеска делегацијата на ЕУ го означи почетокот на проектот „ЕУ за слободата на изразување: усогласување на националното законодавство за медиуми со правото на ЕУ и европските медиумски стандарди“
На денешниот настан присуствуваше и евроамбасадорот Дејвид Гир, кој рече дека земјава се наоѓа во многу важна фаза од процесот на приклучување кон ЕУ, пренесува Frontline.
Евроамбасадорот Гир истакна дека важни се длабинските реформи, не само поради условеноста, туку и за да се изгради општество кое е отпорно, конкурентно, кое одговара на потребите на граѓаните и ги штити нивните фундаментални права, вклучително и во насока на слобода на изразување и слобода до пристап на информации.
Гир додаде дека властите, заедно со медиумите во земјава мора да промовираат медиумска писменост. Медиумите имаат важна улога да и дадат на јавноста точни, фактички информации за важните прашања како и за процесот на приклучување кон ЕУ.
– Ова е многу важно особено во контекст на масовните извори на лажни вести. Властите мора заедно со медиумите и граѓанскиот сектор, да промовираат медиумска писменост, способност на граѓаните да ги сфаќаат информациите, со што се гради отпорност кон лажните вести и дезинформациите, рече евроамбасадорот и упати апел до сите политичари и креатори на политиките да ја почитуваат улогата на медиумите за да се сигурни дека можат да функционираат без никакви притисоци.
Гир нагласи дека доколку до 31 мај Северна Македонија ќе изгуби пристап до програмата и ќе ја изгуби можноста за користење на Креативна Европа, доколку до 31 мај целта за усогласување на националното законодавство со директивата за аудиовизуелни медиумски услуги на ЕУ не се постигне.
На настанот присуствуваа и министерката за култура Бисера Костадиновска-Стојчевска, Министерот за информатичко општество и администрација Адмирим Алити, како и директорот на Агенцијата на аудио и аудиовизуелни медиумски услуги, Зоран Трајчевски.
Алити ја истакна неопходноста за медиумските реформи и додаде дека во таа насока е и самиот проект на МИОА во координација со Делегацијата на ЕУ за усогласување на националното законодавство за медиуми со легислативата на ЕУ и медиумските стандарди.
Тој рече дека треба да се испорача целосно усогласување на законот за аудио и аудиовизуелни медиумски услуги со директивата на ЕУ и додаде дека реформите се жив процес кој расте и постојано се надградува.
– Станува збор за сеопфатен проект кој треба да го испорача еден од главните резултати – целосно усогласување на законот на аудио и аудиовизуелни медиумски услуги со директивата на ЕУ за аудио и аудиовизуелни медиумски услуги од 2018. Реформите треба да бидат во континуитет, да не запираат, да не завршат само со еден или два проекти, со обична измена на еден закон или со усогласување со една директива, рече Алити, истакнувајќи дека нам како општество ни треба и моќен јавен радиодифузен сервис кој ќе ја извршува својата основна улога да информира и едуцира и кој ќе биде ослободен од влијанијата на политичките центри на моќ.
Исто така, се надоврза тој, ни треба и силен и независен регулатор кој проактивно ќе ја следи состојбата во медиумите.
– Очекувам за сите овие предизвици да се предлагаат решенија и идеи од сите засегнати страни во периодот кој следи, заклучи Алити.
Министерката за култура Бисера Костадиновска-Стојчевска нагласи дека слободата на изразување е една од најголемите вредности на модерното, демократско општество и клучен елемент на евроинтеграцијата на државата. Проектот, според неа, е директна помош и поддршка од ЕУ за побрзо усогласување на македонското законодавство со директивата за аудиовизуелни медиумски услуги на ЕУ – зајакнување на институционалниот капацитет, како и обезбедување независност на националното регулаторно тело за медиуми.
