Владата на денешната 146-та седница го разгледа и прифати Оперативниот план за активни програми и мерки за вработување и услуги на пазарот на трудот за 2023 година, на предлог на Министерството за труд и социјална политика.
-Како што образложи МТСП, со Оперативниот план се проширува опфатот на програми и мерки за вработување и услуги на пазарот на трудот за 2023 година, со што ќе се обезбеди креирање нови работни места и зголемување на вработливоста на невработените лица, посебно на младите, на долгорочно невработените и на корисниците на права по основ на гарантирана минимална помош, соопшти владината прес-служба. Со Оперативниот план за 2023 година посебен акцент се става на младите невработени лица до 29 години, долгорочно невработените како и на корисниците на гарантирана минимална помош.
Новина во Планот, информира прес-службата на Владата, е тоа што нискоквалификувани лица, со завршено минимум основно образование, може да се вклучат во мерките за вработување.-Сите евидентирани невработени лица и работодавачи имаат пристап до програмите, односно мерките и услугите за вработување. Правото за учество се определува врз основа на условите и критериумите дефинирани за секоја поодделна програма односно мерка и услуга за вработување, а како општо правило се настојува да се постигне еднаква застапеност на мажи и жени, согласно Законот за еднакви можности на жените и мажите, како и учество на младите лица до 29 години од најмалку 40 отсто во секоја од програмите и мерките и услугите за вработување, се наведува во соопштението од Владата. Носител на Оперативниот план е Министерството за труд и социјална политика, а неговата имплементација е во надлежност на Агенцијата за вработување на Република Северна Македонија, во партнерство со други одговорни институции и организации.
