Премиерот на Бугарија, Росен Желјазков, се сретна со претседателот на Украина, Володимир Зеленски, во Одеса, во рамките на Самитот „Украина – Југоисточна Европа“. Главна тема на разговорот беше повоената обнова на Украина и можностите за бугарско учество во процесот, пренесува Трибуна.
Желјазков истакна дека Бугарија има значителен потенцијал во областа на енергетиката, трговијата, бродскиот транспорт и инфраструктурата. Особено внимание беше посветено на иницијативата на грчкиот премиер за железничко поврзување меѓу Александруполис и Одеса – проект што би можел значително да ја засили регионалната соработка и економскиот развој.
Во разговорите, двајцата лидери се осврнаа и на европската перспектива на Украина, Молдавија и земјите од Западен Балкан. Посебна тема беше положбата на бугарското национално малцинство во Украина. Премиерот Желјазков потенцираше дека постојат големи можности за напредок, особено во областа на образованието, изучувањето на мајчиниот јазик и пристапот до социјалните програми и програмите за обновување.
„Бугарија мора да води проактивна политика кон нашите сонародници во странство“, изјави премиерот, додавајќи дека заштитата на нивните права и поддршката на нивниот развој остануваат приоритет за бугарската држава.
