(ВИДЕО) Интервју со Маричиќ: ЕУ инвестира милијарди во нас, за да нè подготви како нејзина идна членка
Министерот за европски прашања и вицепремиер Бојан Маричиќ е задоволен од досегашниот тек на скринингот, но тврди дека и Брисел е задоволен бидејќи Северна Македонија има подготвени презентери кои реално ја претставуваат состојбата во институциите од каде доаѓаат.
Европа не може да биде излажана вели тој во интервју за Фронтлајн, затоа што таа добро ги познава состојбите кај нас, а тоа се гледа и од извештаите кои ги презентира секоја година.
„Имаме одлично темпо на скринингот. Од ноември почнавме и со билатералниот скрининг и сме во фаза каде ние даваме отчет како ние сметаме дека сме се усогласиле, што ни преостанува и во кој рок тоа би го направиле. Поминавме три поглавја, јавни набавки, статистика и 24. Од средата почнавме со поглавјето 23 кое е многу важно поглавје кое заедно со 24 се оние кои се суштински дел од преговорите што се отвораат на почетокот се затвораат на крајот и се цело време отворени при што промената на системот треба да биде највидлива“, истакна Маричиќ.
Нашата цел, вели Маричиќ, на тие скрининзи не е да ја разубавуваме реалноста ниту да презентираме со розови очила. Целта ни е да ги истакнеме достигнувањата, напорите и успесите што реално се направени, но исто така да ги прикажеме и слабостите кои се обврзуваме да ги подобриме во текот на преговорите. Тоа е и целта на преговорите кои не траат само една или две години туку повеќе години за да има време и простор сите слабости да се надминат.
Не можеме ние да скриеме некоја слабост на системот на државата или на општеството, затоа што Европската комисија ја знае реалната состојба и секоја година ја соопштува во извештаите, нагласува Вицепремиерот.
На прашањето кои придобивки ги имаат граѓаните од ЕУ, министерот Маричиќ потсетува дека Европската Унија е најголем донатор на Западен Балкан, па и на Северна Македонија.
„Од 2007 до сега ЕУ има вложено милијарда евра и тоа неповратни средства а не како кредити што треба да се вратат, туку се вложени во инфраструктурата и во развој. На пример, коридорот десет е изграден со европски пари. Коридорот 8 кој сега се гради исто така се гради со европски пари. Преку 20 општини добиле канализациска мрежа и управување со отпадот со пари од ЕУ. Неколку железнички станици се целосно направени со ЕУ пари. Пречистителната станица за Скопје комплетно е донирана од ЕУ и многу други проекти како градинки и други проекти. ИПА фондовите се убавото лице на ЕУ. Европската унија вложува во својата идна членка. Тогаш ќе добиеме многу повеќе“, нагласува Маричиќ.
За споредба сите автопати во Хрватска се направени со европски пари. Сите автопати во Бугарија се направени со пари од ЕУ, а станува збор за милијарди евра.
Според зборовите на министерот, ЕУ вложува кај нас затоа што нè подготвува за членство. Целта е кога ќе станеме членки граѓаните и нашата инфраструктура да бидат подготвени.
Најдобра споредба за тоа колку средства се добиваат кога една земја е членка, а колку кога не е, министерот Бојан Маричиќ направи со средствата што ЕУ ги издвои во време на ковид-кризата за државите од Западен Балкан и за државите членки на ЕУ.
„Ако Бугарија доби 7 милијарди, или Хрватска 4,5, ние добивме 130 милиони. Таа е разликата меѓу државите членки и оние кои не се. Затоа е во наш интерес што побргу да станеме членка затоа што обемот на средства што ќе ни бидат достапни од фондовите, ќе бидат драстично поголеми“, укажува Маричиќ.
За можна блокада на ЕУ патот од страна на ВМРО-ДПМНЕ, Маричиќ со одговор:
„И предност и слабост е што за прв пат блокадата е во наши раце. Досега имавме соседи што нè блокираа. Преспанскиот отклони една блокада, францускиот предлог отклони друга блокада, но со него не зависиме од волјата на бугарските влади, одлуката е на наш терен. Во нашето собрание. Затоа, секој пратеник ќе има одговорност да објасни зошто неговата земја не добила шанса да стане дел од ЕУ“ вели Маричиќ во интервју за Фронтлајн.
Превземено од Фронтлине
Љубиша Николовски
Камера: Дехран Муратов
Монтажа: Ариан Мехмети
Фотографии: Ангел Ангеловски
