Две од настраданите лица во пожарот во Кочани, кои се примени во бугарските болници, се екстубаирани и имаат големи шанси за закрепнување. Ова го изјави министерот за здравство на Северна Македонија, Арбен Таравари, јавува БГНЕС, пренесува Трибуна.
Министерот Таравари заедно со неговиот бугарски колега доц. д-р Силви Кирилов и министрите за надворешни работи Георг Георгиев и Тимчо Муцунски денеска ја посетија болницата Пирогов каде се згрижени вкупно девет жртви од пожарот во дискотеката „Пулс“.
„Бугарскиот министер за здравство доц. д-р Силви Кирилов беше првиот министер за здравство кој ми се јави на телефон“, рече Таравари, прецизирајќи дека вкупно 15 министри од странски држави го повикале.
Тој се заблагодари на бугарската држава во лицето на претседателот Румен Радев и премиерот Росен Желјазков, како и на лекарите во Пирогов и амбасадорот на Бугарија во РС Македонија Желјазко Радуков.
„Се заблагодарувам и на амбасадорот на Република Бугарија во РС Македонија кој што навистина нонстоп бевме во комуникација за секаква помош која што можи да пружи Република Бугарија за сите случувања во Македонија во последните два три дена. Сакам да му се заблагодарам на целиот бугарски народ за солидарноста“, рече тој.
Министерот Таравари најави дека двајца од пациентите се веќе екстубирани и имаат многу добри шанси за закрепнување. Еден од нив има 31 година, а другиот пациент на 15 години. Уште двајца пациенти се пред екстубација.
Министерот Таравари најави дека во Министерството за здравство во Скопје работи кризен штаб кој проценува дали има потреба да се испраќаат повеќе пациенти на лекување во странство.
„За денеска се планирани уште 19 пациенти, кои ќе заминат надвор од државата. Околу 70 пациенти со полесни рани ќе останат во Македонија. Вечерва кога ќе стигнам дома ќе се сретнеме во кризниот штаб и ќе одлучиме за утре“, рече македонскиот министер за здравство.
Пациентите во најтешка состојба се транспортирани во Бугарија и другите соседни земји. Вака министерот Таравари одговори на прашање на БГНЕС дали имало одложување од македонска страна во барањето помош.
Транспортот на пациентите на лекување во соседните земји, според Таравари, се одвивал во најбрз можен рок, а министерот за надворешни работи на РСМ Тимчо Муцунски прецизира дека тоа се случило во првите 10 часа од трагедијата. „Во првите 10 часа се транспортирани околу 23 пациенти“, додаде Таравари.
Тој рече и дека засега жртвите од пожарот во Кочани се во стабилна состојба. „59 лица загинаа, повредените се вкупно 165 во моментов“, додаде Таравари.
Бугарија изврши навремена евакуација на настраданите од пожарот во дискотеката во Кочани. Ова го изјави министерот за здравство, доц. д-р Силви Кирилов, кој им се заблагодари на сите лекари и бугарските институции кои помогнаа во евакуацијата.
„Во неделата бевме известени дека е неопходно да се пружи помош на РСМ. Ние се организиравме, вчера напишав благодарници, мислам дека тоа не е најважно, но ми е важно бидејќи го забележавме придонесот на лекарите во овој процес, изјави доц. д-р Кирилов.
Тој посочи дека создадовме идеални услови за транспорт на екстремно тешки пациенти бидејќи се на механичка вентилација. Исклучително сум им благодарен на колегите кои ја извршија оваа евакуација, додаде доц. д-р Кирилов.
„Доколку е потребно, денеска сме подготвени да евакуираме уште 10 пациенти. Подготвени сме утре и задутре. Ние сме повеќе од добри соседи. Целосно сме отворени за луѓето од РСМ и не само што сочувствуваме, туку и ги користиме сите знаења и вештини што ги имаме за да им помогнеме на повредените деца“, нагласи министерот.
Во Пирогов се лекуваат 9 пациенти од Кочани, изјави директорот на Пирогов, д-р Валентин Димитров.
Деветтиот пациент примен кај Пирогов е сестра на еден од интубираните пациенти – 15-годишно девојче со тешки расекотини на подлактицата.
„Видовме дека детето има проблем, го испративме во тимот на проф. Маја Ѓурова, беше примено со длабоки изгореници и останува на лекување во Пирогов“, рече директорот на болницата.
Тој изрази голема благодарност до сите сочувствителни граѓани кои овие два дена се одзваа на поканата за дарување крв во болницата Пирогов.
Јас лично можам само да се поклонам и да им се заблагодарам на овие луѓе и имам верба во иднината“, додаде Димитров.
