Венеција ќе ја продолжи практиката на наплата на такси за еднодневни патувања следната година и ќе го зголеми бројот на денови што туристите треба да ги платат за да влезат во градот, додека таксата за посетителите во последен момент ќе се удвои на 10 евра, соопштија властите.
Градоначалникот Луиџи Брунјаро истакна дека целта е да им се помогне на градот и на граѓаните да се борат против прекумерниот туризам и да се избегне огромниот прилив на посетители за време на празниците и викендите.
Мерките за наплата ќе се применуваат од петок до недела и за празници од 18 април до 27 јули следната година, вкупно 54 дена.
Туристите кои нема да резервираат посета до четири дена однапред, наместо вообичаените 5 евра, ќе платат 10 евра, пренесува АП.
Градот ќе наплаќа такса од 8:30 до 16 часот, а нема да ја плаќаат жителите, посетителите родени во Венеција, студентите и работниците, како и туристите кои имаат резервации за хотели или други сместувачки капацитети.
На крајот од првата фаза од тестот, во јули минатата година, официјалните лица рекоа дека данокот му донел на градот 2,4 милиони евра, што претставува околу 1.000 пријави секој ден во таа фаза.
Брунјаро им порача на критичарите, кои овој потег го нарекоа неуспешен, тврдејќи дека тоа не одвратило толку многу туристи колку што се очекуваше, дека се постигнати важни резултати и дека Венеција е првиот град во светот кој се обидува да го реши проблемот со прекумерниот туризам.
„Податоците покажуваат дека во просек во периодот на примена на таксата сме имале околу 7.000 повеќе туристи од претходните години“, рече Џовани Андреа Мартини, советник од опозицијата, тврдејќи дека тоа укажува на неуспех на системот.
