Заканите за бојкот и незавршување на учебната година во утврдениот рок ги принудија директорите во основното образование да започнат процедури за дополнителна исплата на наставниците со скратено работно време. Директорот на основното училиште „26 јули“ во општина Шуто Оризари, Дритон Ганиу рече дека ги прават последните подготовки за начинот на плаќање. Во меѓувреме, првиот човек на Куманово, Максим Димитриевски за Алсат изјави дека неговата општина во моментов не може да ја изврши оваа исплата. Според Димитриевски, блок дотациите од Министерството не се доволни.
„Нема бојкот, ниту најава за бојкот. Проблемот не е нов. Општина Куманово редовно добива блок-дотации за образование и ги реинвестира сите заштедени пари за образование за подобрување на условите за работа во основните и средните училишта. Досега не добивме дополнително финансирање од Министерството за образование за да можеме да ја платиме дополнителната работа на наставниците.“
Од Синдикатот за образование, наука и култура велат дека до крајот на неделава ќе биде јасно кои училишта ќе се соочат со бојкот.
Поради пандемијата, наставата со физичко присуство е достапна само за учениците од прво до трето одделение. Врз основа на здравствените протоколи, некои одделенија дури и се поделени на две, па наставниците имаат повеќе работа.
